சிரியா ஏவுகணைக் கிடங்குகள் மீது இஸ்ரேல் தாக்குதல்

ஜெருசலேம், டிச. 16: சிரியாவில் உள்ள ஏவுகணை கிடங்குகளைக் குறிவைத்து இஸ்ரேல் திங்கள்கிழமை தாக்குதல் நடத்தியது.

மிகவும் சக்திவாய்ந்த அந்தத் தாக்குதலின் அதிர்வுகள் அருகிலுள்ள நிலநடுக்க அளவுகோல்களில் பதிவாகின.

இது குறித்து, அந்த நாட்டின் போர் விவகாரங்களைக் கண்காணித்துவரும் சிரியா மனித உரிமைகள் கண்காணிப்பு அமைப்பு வெளியிட்டுள்ள அறிக்கையில் குறிப்பிடப்பட்டுள்ளதாவது:

சிரியாவில் முன்னாள் அதிபர் அல்-அஸாத் படைகள் ஏவுகணைகளை சேமித்து வைத்திருந்த கிடங்குகளைக் குறிவைத்து இஸ்ரேல் ராணுவம் திங்கள்கிழமை அதிகாலை தாக்குதல் நடத்தியது. அந்தத் தாக்குதல், கடந்த 2012-ஆம் ஆண்டுக்குப் பிறகு சிரியாவில் நடத்தப்பட்டுள்ள மிக சக்திவாய்ந்த தாக்குதலாகும் என்று அந்த அமைப்பு தெரிவித்தது.

டார்டஸ் நகருக்கு அருகிலுள்ள ஏவுகணை கிடங்கில் நடத்தப்பட்ட தாக்குதலின் அதிர்வுகள் இஸ்ரேல் நிலநடுக்கவியல் ஆய்வு மையத்தில் 3.1 அலகுகளாகப் பதிவானதாக 'தி டைம்ஸ் ஆஃப் இஸ்ரேல்' கூறியுள்ளது.