அண்ணா பல்கலை. மாணவி பாலியல் வன்கொடுமை வழக்கில் ஒருவர்தான் குற்றவாளி: காவல் ஆணையர்

வழக்கில் கூடுதலாக 4 பிரிவுகள் சேர்ப்பு

அண்ணா பல்கலை. மாணவி பாலியல் வன்கொடுமை செய்யப்பட்ட வழக்கில், ஒருவர்தான் குற்றவாளி என சென்னை காவல் ஆணையர் ஏ.அருண் தெரிவித்தார்.

இது தொடர்பாக அவர் சென்னையில் வியாழக்கிழமை அளித்த பேட்டி:

பாதிக்கப்பட்ட மாணவி கொடுத்த புகாரின் அடிப்படையில் முதல் தகவல் அறிக்கை பதிவு செய்யப்பட்டது. ஒரு வழக்கில் பாதிக்கப்பட்டவர் அளித்த தகவலை அப்படியே முதல் தகவல் அறிக்கையில் சேர்ப்பதுதான் சட்ட நடைமுறையும், விதிமுறையுமாகும். அதனால்தான் முதல் தகவல் அறிக்கையில் மாணவி கொடுத்த புகார் அப்படியே சேர்க்கப்பட்டது. அதில் காவல்துறை யினர் எந்த திருத்தமும் செய்யக்கூடாது.

கோட்டூர்புரம் உதவி ஆணையர் பாரதிராஜா தலைமையில் 4 தனிப்படைகள் அமைக்கப்பட்டு, விசாரணை நடத்தப்பட்டது. அறிவியல் பூர்வமாக ஆதாரங்கள் சேகரிக்கப்பட்டு, விசாரணை நடத்தப்பட்டது. ஞானசேகரன்தான் குற்றத்தில் ஈடுபட்டதற்கான உறுதியான தடயங்கள் சேகரிக்கப்பட்ட பின்னரே, அவர் கைது செய்யப்பட்டது.