வங்கதேச போராட்டம்: அரசு, மாணவர் அமைப்புகள் கருத்து வேறுபாடு அதிகரிப்பு

வங்கதேசத்தில் பிரதமர் ஷேக் ஹசீனாவை ஆட்சியிலிருந்து அகற்றிய போராட்டத்தின் அடிப்படை நோக்கம் தொடர்பாக, போராட்டத்தில் தீவிரமாக ஈடுபட்ட மாணவர் அமைப்புகளுக்கும் இடைக்கால அரசு மற்றும் அரசியல் கட்சிகளுக்கும் இடையே கருத்து வேறுபாடுகள் அதிகரித்து வருகின்றன.

கடந்த 1971-ஆம் ஆண்டில் இந்தியாவின் உதவியுடன் போரிட்டு வங்கதேசத்துக்கு பாகிஸ்தானிடமிருந்து சுதந்திரம் வாங்கித் தந்தவர்களின் வாரிசுகளுக்கு அரசுப் பணிகளில் 30 சதவீத இடஒதுக்கீடு அளிக்கப்பட்டு வந்தது. மாணவர்களின் எதிர்ப்பால் அந்த இடஒதுக்கீடு நிறுத்தி வைக்கப்பட்டு இருந்த நிலையில், கடந்த 2024 ஜூலை மாதம் அந்த இடஒதுக்கீட்டை நிறுத்தி வைத்த அரசின் உத்தரவை உயர் நீதிமன்றம் ரத்து செய்தது.

அந்தத் தீர்ப்புக்கு எதிராக மாணவர்கள் மீண்டும் தீவிர போராட்டத்தில் ஈடுபட்டனர் (படம்). அவர்களுக்கு எதிராக இடஒதுக்கீட்டுக்கு ஆதரவான மாணவர் அமைப்பினரும் களமிறங்கியதையடுத்து வன்முறை வெடித்து நூற்றுக்கணக்கானவர்கள் உயிரிழந்தனர். அதையடுத்து, சர்ச்சைக்குரிய இடஒதுக்கீட்டை 5 சதவீதமாக உச்ச நீதிமன்றம் குறைத்தது.

இருந்தாலும், பிரதமர் ஷேக் ஹசீனா பதவி விலக வேண்டும் என்று வலியுறுத்தி அவரின் அதிகாரபூர்வ இல்லத்தை நோக்கி மாணவர்கள் கடந்த 2024 ஆகஸ்ட் 5-ஆம் தேதி ஊர்வலமாகச் சென்றனர். நிலைமை கைமீறிச் செல்வதை உணர்ந்த ஷேக் ஹசீனா, ராஜிநாமா செய்து விட்டு பாதுகாப்புக்காக நாட்டை விட்டு வெளியேறி இந்தியாவில் தஞ்சமடைந்தார்.