40 ஆண்டுகளுக்குப் பின் போபால் ஆலையில் நச்சுக் கழிவுகள் அகற்றம்

மத்திய பிரதேச மாநிலம், போபாலில் கடந்த 1984-ஆம் ஆண்டில் விஷவாயு கசிந்த ஆலையில் இருந்து 40 ஆண்டுகளுக்குப் பின் நச்சுக் கழிவுகள் புதன்கிழமை (ஜன. 1) இரவு அப்புறப்படுத்தப்பட்டன.

377 டன் எடையுள்ள அக்கழிவுகள், தார் மாவட்டம், பீதம்பூர் பகுதியில் உள்ள தொழிலக கழிவு அழிப்பு ஆலைக்கு 12 கண்டெய்னர் லாரிகள் மூலம் எடுத்துச் செல்லப்பட்டன.

போபாலில் இயங்கிவந்த யூனியன் கார்பைட் பூச்சிக்கொல்லி உற்பத்தி ஆலையில், கடந்த 1984-ஆம் ஆண்டு டிசம்பர் 2,3-ஆம் தேதிகளுக்கு இடைப்பட்ட இரவில் மெத்தில் ஐசோசயனேட் என்ற விஷவாயு கசிந்தது. இந்த விஷவாயு தாக்குதலால் 5,479 பேர் உயிரிழந்தனர்; ஆயிரக்கணக்கானோருக்கு தீவிரமான மற்றும் நீண்ட கால உடல் நல பாதிப்புகள் ஏற்பட்டன.

இச்சம்பவத்தைத் தொடர்ந்து மூடப்பட்ட ஆலையில் 40 ஆண்டுகளாக நச்சுக் கழிவுகள் அகற்றப்படாமல் இருந்தன.