શિવ શંકરનો શ્રાવણ આવ્યો બમબમ ભોલે!!

ગલી મહોલ્લાને નાકે નાનકડી એવી દેરી ચણીને શિવલિંગની સ્થાપના કરી, શંકરનું દેરું બનાવવામાં આવે, અને આ રીતે લોકોની શ્રદ્ધા એ શિવલિંગ પ્રત્યે અર્પિત થાય છે.

શ્રાવણ મહિનાનો પ્રારંભ થઈ ગયો છે, તો આ વખતે થયું કે લોકોની શ્રદ્ધા અને વિશ્વાસ વધારનારા અજન્મા આશુતોષનાં સ્વાગત રૂપે આપણે સૌની આસ્થાના કેન્દ્ર બિંદુ એવા ભગવાન આશુતોષ વિશે વાત કરીએ, ચાલો થોડું શિવ શંકર વિશે જાણીએ. હિન્દુ પ્રજા આમ તો જન્મથી ધાર્મિક હોય છે, અને એમાં મુખ્યત્વે શિવ શંકરને આરાધવા વાળા ઘણાં ભક્તો છે, ગુજરાતની પ્રજા તો એમાં વિશેષ રૂપે આવે. ગલી મહોલ્લાને નાકે નાનકડી એવી દેરી ચણીને શિવલિંગની સ્થાપના કરી, શંકરનું દેરું બનાવવામાં આવે, અને આ રીતે લોકોની શ્રદ્ધા એ શિવલિંગ પ્રત્યે અર્પિત થાય છે. ભગવાન આશુતોષ પથ્થરમાં વસીને પોતાનો વિશ્વાસ ભક્તનાં મનમાં દૃઢ કરે. શિવલિંગ એ હિન્દુઓમાં સૌથી વધુ પૂજાતું સ્વરૂપ છે, કારણ કે ભગવાન શંકરની પૂજા સાવ સીધી સાદી છે. આમ તો વેદ અનુસાર શિવલિંગમાં ત્રિદેવ રહે છે. એટલે કે બ્રહ્મા વિષ્ણુ અને મહેશ ત્રણેય દેવો શિવલિંગની અંદર રહેલા હોય છે, અને સંસારી એવા શિવ શંકર આસાનીથી રીજી જતા હોય ને, સૌ કોઈ શંકરને આ રીતે જ આરાધે છે. અન્ય દેવી દેવતાઓના કર્મકાંડો ભરેલા યજ્ઞ, દરેક વ્યક્તિ કરી શકે નહીં.