ഇന്നു തീരുമാനം

ഇന്ത്യയും സിംബാബ്വേയും തമ്മിൽ ആദ്യമായാണു ട്വന്റി20 ലോകകപ്പിൽ ഏറ്റുമുട്ടുന്നത്.

മെൽബൺ: ട്വന്റി20 ക്രിക്കറ്റ് ലോകകപ്പിലെ സൂപ്പർ 12 ഗ്രൂപ്പ് 2 വിലെ അവസാന മത്സരങ്ങൾ ഇന്ന്. പുലർച്ചെ നടക്കുന്ന ആദ്യ മത്സരത്തിൽ ഹോളണ്ടും ദക്ഷിണാഫ്രിക്കയും തമ്മിലും പിന്നാലെ നടക്കുന്ന മത്സരത്തിൽ പാകിസ്താൻ ബംഗ്ലാദേശിനെയും നേരിടും.

ഇന്ത്യൻ സമയം ഉച്ചയ്ക്ക് 1.30 മുതൽ നടക്കുന്ന മത്സരത്തിൽ ഇന്ത്യ സിംബാബ്വേയെ നേരിടും. നാല് കളികളിൽ നിന്ന് മൂന്ന് ജയവും ഒരു തോൽവിയുമടക്കം ആറ് പോയിന്റ് നേടിയ ഇന്ത്യ ഒന്നാമതും അഞ്ച് പോയിന്റുള്ള ദക്ഷിണാഫ്രിക്ക രണ്ടാമതുമാണ്. നാല് പോയിന്റുള്ള പാകിസ്താനാണു മൂന്നാമത്. ഇന്ത്യയുടെയോ ദക്ഷിണാഫ്രിക്കയുടെയോ തോൽവി പാകിസ്താന്റെ സാധ്യത വർധിപ്പിക്കും. പാകിസ്താനും ദക്ഷിണാഫ്രിക്കയും ജയിക്കുകയാണങ്കിൽ ഇന്ത്യക്കു സെമിയിൽ കടക്കാൻ സിംബാബ്വേയെ തോൽപ്പിക്കണം.