ટીમ ઇન્ડિયાની જીતનું ગેરન્ટી કાર્ડ ટોપ ઓર્ડર પાસે નહીં, મિડલ ઓર્ડર પાસે!

હવે ઋષભ પંત અને હાર્દિક પંડ્યાનો જમાનો આવી ગયો

નવી દિલ્હી, મંગળવારઃ

જે રીતે ભારતને મિડલ ક્લાસનો દેશ માનવામાં આવે છે એવી જ રીતે હવે ટીમ ઇન્ડિયા પણ મિડલ ઓર્ડરની ટીમ બનતી જઈ રહી છે. ફોર્મેટ ટેસ્ટ હોય, વન ડે હોય કે પછી ટી-૨૦, હવે એવું લાગે છે કે ત્રણ વિકેટ પડ્યા બાદ જ ભારતની અસલી બેટિંગ શરૂ થાય છે. ઈંગ્લેન્ડના પ્રવાસ દરમિયાન ત્રણેય ફોર્મેટની મળીને કુલ સાત મેચમાં ઓછામાં ઓછી પાંચ વાર આ અંગેના સંકેત મળ્યા. આની પહેલાં ઓસ્ટ્રેલિયાના પ્રવાસ અને ઘરેલુ શ્રેણીના મુકાબલામાં પણ આવું જ જોવા મળ્યું હતું. આના પરથી કહી શકાય કે ટીમ ઇન્ડિયાની જીતનું ગેરન્ટી કાર્ડ ટોપ ઓર્ડર પાસે નહીં, પરંતુ મિડલ ઓર્ડર પાસે છે. ટીમ ઇન્ડિયાનું પાવર સેન્ટર શિફ્ટ થઈ ગયું છે. ભારતના સુપરસ્ટાર્સ ટોપ ઓર્ડરમાં નહીં, બલકે મિડલ ઓર્ડરમાં છે.

ભલે લોકોની ધારણા હોય કે સોશિયલ મીડિયા પર વિરાટ કોહલી અને રોહિત શર્મા હાજર વર્તમાન સમયના સૌથી મોટા ક્રિકેટિંગ સ્ટાર હોય, પરંતુ ગ્રાઉન્ડ પર તસવીર બદલાઈ ગઈ છે. હવે ઋષભ પંત અને હાર્દિક પંડ્યાનો જમાનો આવી ગયો છે.