સંવાદના અભાવે જનરેશન ગેપ પણ વધ્યો

મેડિકલ સાયન્સની વાત માનીએ તો પરિવારના સભ્યો વચ્ચે સંવાદની કમીના કારણે આજકાલ માનસિક ડિપ્રેશન ઘણું વધી રહ્યું છે. ખાસ કરીને બાળકોમાં તેની અસર સ્પષ્ટ દેખાઈ રહી છે

સંવાદ કોઇ પણ સંબંધોની પહેલી અને જરૂરી આવશ્યકતા હોય છે, તેમાં સાંભળવું, સમજણ, અરસપરસનું સન્માન અને ભાવનાઓ સામેલ હોય છે. સંક્ષિપ્તમાં કહીએ તો સંવાદ કરવાનો અર્થ એ છે કે કેવી રીતે આપવું છે અને કેવી રીતે પ્રાપ્ત કરવું છે. સૌથી વ્યવહારિક રીતે પરિભાષિત, આ વિચારોસૂચનાઓને પ્રસારિત કરવાની પ્રાકૃતિક પ્રક્રિયા છે અને એક નિશ્ચિત સમયમાં એક વ્યક્તિથી બીજી વ્યક્તિની ભાવનાઓને અભિવ્યક્ત કરવાનું માધ્યમ છે. આજની ભાગદોડ ભરેલી જિંદગી અને વધતી ટેકનોલોજીના સમયમાં બાળકો અને માતા-પિતા વચ્ચે સંવાદ ઘટતો જાય છે. કેટલીક વાર સંવાદ થાય છે તો તે પણ વોટ્સએપ ગ્રૂપના માધ્યમથી. આવા સંજોગોમાં પેરન્ટ્સ અને બાળકો વચ્ચે અંતર પણ વધતું જાય છે.

ચાણક્યનીતિ કહે છે કે સંતાનને લઇ દરેક માતા-પિતાએ ગંભીર અને જાગૃત રહેવું જોઇએ, સાથે બાળકોને સારા સંસ્કાર આપવાના પ્રયાસ પણ કરવા જોઇએ. હવે જરા વિચારો કે જ્યારે માતાપિતા અને બાળકો વચ્ચે સંવાદની કડી જ નબળી પડશે ત્યારે બાળકોને સારા સંસ્કાર કેવી રીતે મળી શકશે? બાળકો જ્યારે માતા-પિતાની ઉપેક્ષાનો શિકાર બને છે ત્યારે તેઓ એક એવી દુનિયા તરફ આગળ વધતાં જાય છે, જે ભવિષ્યમાં ચિંતાનું કારણ બને છે.