ભંગારકાંડમાં સિવિલ હોસ્પિટલની તાનાશાહી: સિક્યોરિટી સુપરવાઇઝરની નોકરીનો ભોગ લેવાયો

કરોડો રૂપિયાના કૌભાંડની તપાસ કરવાના બદલે સુપરિન્ટેન્ડેન્ટે સિક્યોરિટી સુપરવાઇઝર મહિલાને વાંક વગર કાઢી મૂકતાં કર્મચારીઓમાં રોષની લાગણી

અમદાવાદ, મંગળવાર

પાડાના વાંકે પખાલીને ડામ જેવો ઘાટ અમદાવાદની સિવિલ હોસ્પિટલમાં ઘડાયો છે, જ્યાં સત્તાધીશોએ પોતાનાં કૌભાંડો પર પરદો નાખવા માટે એક સિક્યોરિટી સુપરવાઇઝર મહિલાની નોકરીનો ભોગ લઇ લીધો છે. ‘સમભાવ મેટ્રો’એ ‘૧૨૦૦ બેડની હોસ્પિટલના બેઝમેન્ટમાં કરોડો રૂપિયાનાં સાધનો ફેંકી દેવાયાં' શીર્ષક સાથેનો અહેવાલ પ્રસિદ્ધ કર્યો હતો, જેમાં સિવિલ હોસ્પિટલના સત્તાધીશોએ તપાસ કરવાની જગ્યાએ એક સિક્યોરિટી સુપરવાઇઝર મહિલાને નોકરીમાંથી કાઢી મૂકી છે. સત્તાધીશો કૌભાંડની યોગ્ય તપાસ કરવાની જગ્યાએ સિક્યોરિટી સુપરવાઇઝરને નોકરીમાંથી કાઢીને ગર્વ મહેસૂસ કરી રહ્યા છે, જ્યારે કર્મચારીઓમાં રોષની લાગણી ફેલાઈ છે.