હજુ બે દિવસ સાચવજોઃ આઠ જિલ્લામાં ઓરેન્જ, સાત જિલ્લામાં યલો એલર્ટ જારી

મેઘરાજાએ રૌદ્ર સ્વરૂપ ધારણ કરતાં રાજ્યના અનેક જિલ્લામાં જનજીવન અસ્તવ્યસ્તઃ તંત્ર એલર્ટ પર

અમદાવાદ, મંગળવાર

શ્રાવણ માસનાં સરવણાંના બદલે ગઈ કાલથી અમદાવાદ સહિત રાજ્યભરમાં મેઘરાજાની તોફાની બેટિંગ ચાલુ છે. ઉત્તર અને દક્ષિણ ગુજરાતમાં મેઘરાજાએ ફરી જોરદાર જમાવટ કરી છે. હવામાન વિભાગની આગાહી પ્રમાણે બે દિવસ મેઘો મન મૂકીને વરસશે. રાજ્યના કેટલાક જિલ્લામાં ભારેથી અતિભારે વરસાદ પડશે. હવામાન વિભાગે આજે આઠ જિલ્લામાં ઓરેન્જ એલર્ટ અને આવતી કાલે સાત જિલ્લામાં યલો એલર્ટ જાહેર કર્યું છે. આજે ઉત્તર ગુજરાતના બનાસકાંઠા, સાબરકાંઠા અને જામનગર, પાટણ, મહેસાણા, અરવલ્લી, સુરત, નવસારી, વલસાડ, કચ્છ, મોરબી, દ્વારકા અને ગીર-સોમનાથમાં ઓરેન્જ એલર્ટ જાહેર કરાયું છે, જ્યાં સાત-સાત ઈંચ સુધી વરસાદ ખાબકી શકે છે.

મેઘરાજાએ રૌદ્ર સ્વરૂપ ધારણ કરતા રાજ્યના અનેક જિલ્લાઓમાં જળબંબાકારની સ્થિતિ સર્જાઈ છે અને જનજીવન અસ્તવ્યસ્ત થઈ ગયું છે. હવામાન વિભાગની આગાહીને લઈને રાજ્યનું વહીવટીતંત્ર એલર્ટ મોડ પર છે અને કોઈપણ પરિસ્થિતિને પહોંચી વળવા માટે ટીમો તહેનાત રાખવામાં આવી છે.