પ્રોપર્ટી ટેક્સઃ ૭૫ ટકા વ્યાજ રિબેટ યોજનામાં રજાનો માહોલ છતાં રૂ. ૧૩ કરોડની આવક

૮ ઓગસ્ટથી ૨૧ ઓકટોબર સુધી રહેણાક અને બિનરહેણાક મિલકતોમાં ૪.૫ ટકા વ્યાજ લેવાશે

અમદાવાદ, શનિવાર

શહેરના શાસકો દ્વારા અગાઉ એડ્વાન્સ પ્રોપર્ટી ટેક્સ રિબેટ યોજનાને ત્રણ-ત્રણ મહિના સુધીની જાહેર કરીને કરદાતાઓને તેમના પ્રોપર્ટી ટેક્સના બિલને એડ્વાન્સમાં ભરી દેવાની અભૂતપૂર્વ તક અપાઈ હતી. ત્યાર બાદ હવે કરદાતાઓ માટે ૭૫ ટકા વ્યાજ માફીની યોજના જાહેર કરાઈ છે. આ યોજનાને પણ કરદાતાઓએ મોકળા મને વધાવી લીધી હોઈ ચાલુ ઓગસ્ટ મહિનામાં રજાનો માહોલ હોવા છતાં મ્યુનિ. તિજોરીમાં આવક પેટે રૂ. ૧૩ કરોડ ઠલવાયા છે. આ યોજનાને સારો પ્રતિસાદ મળવાથી મ્યુનિ. પ્રોપર્ટી ટેક્સ વિભાગના ચહેરા ઉપર પણ ચમક આવી છે.

દેશ હાલમાં આઝાદીના ૭૫મા પર્વની શાનદાર ઉજવણી કરી રહ્યો છે. તાજેતરમાં આઝાદીના અમૃત પર્વ નિમિત્તે ૧૫ ઓગસ્ટના સ્વતંત્રતા દિવસ નિમિત્તે સમગ્ર ભારતમાં 'હર ઘર તિરંગા' મહાઅભિયાન હાથ ધરાયું હતું, જેમાં તા. ૧૩, ૧૪, ૧૫ ઓગસ્ટે અમદાવાદના ઘ૨, ઓફિસ, દુકાન તિરંગાથી શોભી ઊઠ્યા હતા.