ઉસ્માનપુરામાં મેઘાએ ધબધબાટી બોલાવી: સિઝનનો કુલ ૫૪.૬ ઈંચ વરસાદ ખાબક્યો

કઠવાડામાં માત્ર ૩૦.૨૯ ઈંચ વરસાદ નોંધાયો

અમદાવાદ, સોમવાર

શહેરમાંથી ચોમાસાએ સત્તાવાર રીતે વિદાય લઈ લીધી છે તેમ છતાં ફાંટાબાજ કુદરતના કારણે છેલ્લા કેટલાક દિવસથી વાદળછાયું વાતાવરણ સર્જાઈને ક્યારેક ઝરમર વરસાદ પણ વરસે છે. ગઈ કાલે તો શરદ પૂનમનો ચંદ્રમા વાદળાંઓથી ઢંકાઈ ગયો હતો. મ્યુનિ. તંત્ર દ્વારા પાલડી ખાતેનો મધ્યક્ષ કન્ટ્રોલરૂમ ગત ૩૦ સપ્ટેમ્બરે બંધ કરાયા બાદ હવે તેને પુનઃ વરસાદ વિષયક માહિતી મીડિયાને આપવા માટે શરૂ કરાયો છે. દરમિયાન, ચાલુ ચોમાસામાં પશ્ચિમ ઝોનના ઉસ્માનપુરામાં મેઘાએ ધબધબાટી બોલાવતાં કુલ ૫૪.૬ ઈંચ વરસાદ ખાબક્યો હોવાની વિગત જાણવા મળી છે.