નારણપુરા રોડલાઈનઃ સ્થાનિક લોકોના ઉગ્ર વિરોધના પગલે ડિમોલિશન એક દિવસ મોકૂફ

અગાઉ વિધાનસભાની ચૂંટણી વખતે રોડલાઈનનો વિવાદ વકરતાં તેનો અમલ સ્થગિત કરાયો હતો: તંત્રનો કુલ ૭૩ મિલકત ઓછીવત્તી કપાતમાં જશે તેવો દાવો

અમદાવાદ, ગુરુવાર

નારણપુરા રેલવે ક્રોસિંગથી નારણપુરા ગામ સુધીના ૮૦ ફૂટ પહોળા રોડને ૧૦૦ ફૂટ પહોળો કરવા માટેનું મ્યુનિસિપલ તંત્રનું આયોજન ફરીથી મોકૂફ રખાયું છે. ગઈ કાલે સ્થાનિક રહેવાસીઓએ આ મામલે દેખાવો યોજીને ઉગ્ર વિરોધ કર્યો હતો અને આજે સવારે પણ રોડલાઈનના અસરગ્રસ્તો મોટી સંખ્યામાં એક સ્થળે અમલનો વિરોધ કરવા માટે એકઠા થયા હતા. આ લખાઈ રહ્યું છે ત્યારે મ્યુનિસિપલ તંત્ર આજે રોડલાઈનમાં કપાત કરશે નહીં અને હવે પછી સમય અને સંજોગો જોઈને આ ઓપરેશન ડિમોલિશન હાથ ધરાશે તેવી ચર્ચાઓ ઊઠી છે.