ઓરેન્જ એલર્ટ: ગરમીથી બચવા સાવચેતી જરૂરી

અમદાવાદીઓ માટે ગુરુવાર અને શુક્રવાર ભીષણ ગરમીવાળા રહેશે

અમદાવાદ, મંગળવાર

શહેર સહિત ગુજરાતભરમાં હવે ઉનાળાની કાળઝાળ ગરમી લોકોને દઝાડી રહી છે. અત્યાર સુધી વેસ્ટર્ન ડિસ્ટર્બન્સ તેમજ સાઇક્લોનિક સર્ક્યુલેશનના કારણે ક્યારેક કમોસમી વરસાદ પડતો તો આંશિક વાદળછાયા વાતાવરણના કારણે ગરમીની તીવ્રતાની અસર ઓછી રહેતી હતી, પરંતુ હવે આ પ્રકારનું વિષમ હવામાન દૂર થતાં સૂર્યનારાયણ સવારથી જ આકાશમાંથી અગનગોળા ઝીંકી રહ્યા છે. પરિણામે ગરમીના આધારે વિવિધ પ્રકારના એલર્ટ સ્થાનિક હવામાન વિભાગ દ્વારા જાહેર કરાઈ રહ્યાં છે. આપણા અમદાવાદની વાત કરીએ તો હવે મહત્તમ તાપમાન ૪૩ ડિગ્રી જેટલું થવાનું હોઈ લોકોએ ઓરેન્જ એલર્ટ સહન કરવું પડશે, જોકે ગરમીના પ્રકોપથી લૂ લાગવી કે સનસ્ટ્રોકથી મૃત્યુ નીપજતાં હોઈ લોકોએ ગરમીથી બચવા સાવચેતી રાખવી જરૂરી બની છે.