પૈસા નહીં આપનારાં વૃદ્ધ માતા-પિતાને નિર્દય દીકરાએ લાફા ઝીંકી માર માર્યો

રૂ. ૨૫ હજાર માટે ઉશ્કેરાયેલા પુત્રે ઘરમાં તોડફોડ કરી મા-બાપને કાઢી મૂકવાની ધમકી પણ આપી

અમદાવાદ, શુક્રવાર

દીકરાને જરા પણ તકલીફ થાય તો માતા-પિતા દીકરાની તકલીફને દૂર કરવા માટે તમામ પ્રયાસ કરે છે પણ દીકરો જ્યારે ભણી-ગણીને મોટો થાય અને પગભર થાય છે ત્યારે તેની જવાબદારી માતા-પિતાને સાચવવાની હોય છે. સમાજમાં એવા અનેક કિસ્સા છે જેમાં દીકરો એક માતા-પિતાને પણ સાચવી શકતો નથી. કેટલાક કિસ્સામાં તો પુત્રએ માતા-પિતાને માર મારી ઘર બહાર કાઢી મૂક્યાં હોવાનું પણ સામે આવે છે ત્યારે આ પ્રકારનો એક કિસ્સો નરોડામાં સામે આવ્યો છે, જેમાં પૈસા આપવાની ના પાડતાં ઉશ્કેરાયેલા પુત્રએ ઘરમાં તોડફોડ કરી વૃદ્ધ માતા-પિતાને લાફા ઝીંકી માર મારીને ઘરમાંથી કાઢી મૂકવાની ધમકી આપી હતી. આ મામલે નરોડા પોલીસે પુત્ર વિરુદ્ધમાં ગુનો નોંધી વધુ તપાસ હાથ ધરી છે