લગ્નનો પ્રસ્તાવ ઠુકરાવનારી યુવતીના ગળા ઉપર તેના જ પરિવાર સામે છરી હુલાવી દીધી

નોબલનગરનો ચોંકાવનારો બનાવઃ યુવતીના છૂટાછેડા નહીં થયા હોવાથી તેણે યુવક સાથે લગ્ન કરવાનો ઇનકાર કરી દીધો હતો

અમદાવાદ, ગુરુવાર

શહેરના નોબલનગર વિસ્તારમાં પરિવાર સાથે લગ્નનો પ્રસ્તાવ લઇને ગયેલા યુવકે યુવતીને ગળા પર છરીનો ઘા મારી દીધો હોવાની ચોંકાવનારી ઘટના સામે આવી છે. યુવતીએ ઘરના સભ્યો વચ્ચે યુવક સાથે લગ્ન કરવાનો ઇનકાર કરી દીધો હતો. યુવક રિક્ષા ચલાવે છે અને તે યુવતીના પ્રેમમાં હતો, જોકે યુવતી તેને મિત્ર માનતી હતી. યુવતી પેસેન્જર તરીકે યુવકની રિક્ષામાં બેઠી ત્યારથી તેઓ એકબીજાના સંપર્કમાં હતાં.

નોબલનગર વિસ્તારમાં આવેલી પોલીસ ચોકીની પાછળ રહેતી ૨૭ વર્ષીય લક્ષ્મી ચૌહાણે સરદારનગર પોલીસ સ્ટેશનમાં નવીન કોષ્ટી (રહે. નારોલ) નામના યુવક વિરુદ્ધ હત્યાની કોશિશની ફરિયાદ કરી છે. લક્ષ્મી હાલ સિવિલ હોસ્પિટલમાં જીવન-મરણ વચ્ચે ઝોલાં ખાઇ રહી છે, જેની પાછળનું કારણ નારોલ વિસ્તારમાં રહેતો નવીન કોષ્ટી છે, જે એક તરફી પ્રેમમાં પાગલ છે. લક્ષ્મીએ લગ્ન કરવાનો ઇનકાર કરી દેતાં નવીને પરિવારના સભ્યો વચ્ચે હિંસક હુમલો કરી દીધો હતો.