અશ્વિનની આંધીમાં ઊડ્યા કેરેબિયન્સઃ પ્રથમ દિવસે જ ભારતતી જીત પાક્કી! વેસ્ટ ઇન્ડીઝનો વાવટો ૧૫૦માં સંકેલ્યા બાદ ટીમ ઇન્ડિયાની મજબૂત શરૂઆત

પ્રથમ દિવસની રમતના અંતે રોહિત-જયસ્વાલે ૮૦ રન બનાવી ભારતને શાનદાર શરૂઆત અપાવી

ડોમિનિકા, ગુરુવારઃ

વેસ્ટ ઇન્ડીઝ સામે ભારતીય ટીમે ડોમિનિકા ટેસ્ટમાં પ્રથમ દિવસે ધમાકેદાર પ્રદર્શન કરીને મજબૂત પકડ મેળવી લીધી છે. બે ટેસ્ટ મેચની શ્રેણીના આ પ્રથમ મુકાબલામાં ભારતીય ટીમે સકંજો કસી લીધો છે. આનું મોટું કારણ સ્ટાર સ્પિનર આર. અશ્વિન રહ્યો, જેણે પ્રથમ ઇનિંગ્સમાં પાંચ વિકેટ ઝડપીને વિન્ડીઝની ટીમને પોતાની આંધીમાં વેરવિખેર કરી નાખતાં યજમાન ટીમનો વાવટો માત્ર ૧૫૦ રનમાં સંકેલી નાખ્યો હતો. ત્યાર બાદ ભારતીય ઓપનર રોહિત શર્મા અને યશસ્વી જયસ્વાલે શાનદાર બેટિંગ કરીને ભારતને મજબૂત શરૂઆત અપાવી હતી. ગઈ કાલની રમત બંધ રહી ત્યારે ભારતનો સ્કોર વિના વિકેટે ૮૦ રન હતો.