ઈંડાંની લારી મૂકવા મામલે મામા-ભાણિયા પર ખૂની હુમલોઃ ભાણિયાનું કરુણ મોત

બે યુવક અને એક યુવતી ઘાતકી હુમલો કરી ફરાર થયાંઃ મૃતક યુવક અસ્થિર મગજનો હોવાનું સામે આવ્યું

ઈજાગ્રસ્ત સતીશ કવંડર

અમદાવાદ, શનિવાર

શહેરના સૈજપુર ટાવર નજીક આવેલા ચુનારાવાસમાં રહેતા જગદીશ ચુનારાની સામાન્ય બાબતે થયેલી હત્યાની શાહી હજુ સુકાઇ નથી ત્યારે મોડી રાતે અમરાઇવાડી વિસ્તારમાં આવેલા ભાઇપુરામાં સામાન્ય બાબતે એક યુવકની ઘાતકી હત્યા કરવામાં આવી છે, જ્યારે મૃતકના મામા ગંભીર રીતે ઇજાગ્રસ્ત છે. ઈંડાની લારી મૂકવા બાબતે મોડી રાતે બે ભાઇ તેમજ એક યુવતીએ પાડોશમાં રહેતા મામા-ભાણિયા પર છરી વડે હુમલો કર્યો હતો, જેમાં ભાણિયાનું મોત થયું છે. પોલીસે હત્યાનો ગુનો દાખલ કરીને ત્રણ આરોપીઓને ઝડપી પાડવા માટેનાં ચક્રો ગતિમાન કર્યાં છે. પોલીસસૂત્રોના જણાવ્યા અનુસાર સામસામે જોવાના મામલે બંને પક્ષો બાખડ્યા હતા, જેમાં હુમલો થયો હોવાની આશંકા છે.