શહેરમાં ત્રણ દિવસ સુધી હળવો વરસાદ પડવાની હવામાન વિભાગની આગાહી

વલસાડ, નવસારી, ડાંગ, નર્મદા, છોટાઉદેપુર, દમણ, દાદરાનગર હવેલીના છૂટાછવાયા વિસ્તારોમાં આવતી કાલે ભારે વરસાદ પડી શકે છે

અમદાવાદ, શનિવાર

છેલ્લા કેટલાય સમયથી શહેર સહિત રાજ્યમાં વરસાદે વિરામ લીધો છે. ઘણા સમયથી વરસાદી સિસ્ટમ સક્રિય ન હોવાથી રાજ્યમાં ક્યાંય પણ નોંધપાત્ર વરસાદ પડ્યો નથી. જોકે હવે બંગાળની ખાડીમાં નવી સિસ્ટમ સર્જાતાં શહેર સહિત રાજ્યમાં વરસાદ પડવાની શક્યતા ઊભી થઈ છે. દરમિયાન, સ્થાનિક હવામાન વિભાગ દ્વારા અમદાવાદમાં આજથી ત્રણ દિવસ સુધી હળવો વરસાદ પડવાની આગાહી કરાઈ છે.

હવામાન સ્થાનિક વિભાગની આગાહી મુજબ શહેરમાં આજે, આવતી કાલે અને સોમવારે – એમ સતત ત્રણ દિવસ સુધી હળવો વરસાદ પડી શકે છે, જ્યારે ૨૨ ઓગસ્ટ, મંગળવારથી ૨૪ ઓગસ્ટ સુધી શહેરમાં વાદળછાયું વાતાવરણ રહેશે.