ખાખી પર ગ્રહણ: કાગડાપીઠ પોલીસ સ્ટેશન ફરી વિવાદમાં, ચોરીનો આરોપી ફરાર થઈ ગયો

ફરાર આરોપીને પકડવા માટે પોલીસ તેમજ ક્રાઈમ બ્રાંચની ટીમ કામે લાગીઃ PSo વિરુદ્ધ ફરિયાદ

દિવાળી બાદ શહેર પોલીસ પર ગ્રહણ લાગી ગયું હોય તેવું લાગી રહ્યું છે કારણ કે એક પછી એક ગુનાખોરીની ઘટનાઓ વધી રહી છે, જેના કારણે પોલીસ વિવાદમાં આવી છે. થોડા દિવસ પહેલાં કાગડાપીઠ પોલીસ સ્ટેશન પાસે થયેલી યુવકની હત્યાનો વિવાદ હજુ શાંત નથી પડ્યો કે મોડી રાતે ચોરીનો આરોપી પોલીસને ચકમો આપીને ફરાર થઇ જતાં વધુ એક વિવાદ સર્જાયો છે. કાગડાપીઠ પોલીસ સ્ટેશનમાં પોલીસ કર્મચારીઓ કામમાં એકદમ તલ્લીન હતા ત્યારે ચોરીનો એક આરોપી ચપળતાપૂર્વક જતો રહ્યો હતો. જ્યારે પોલીસ કર્મચારીને ખબર પડી ત્યારે તેને શોધવા માટે અનેક ટીમ બનાવી હતી.

શહેરમાં ચોરી, ચેઇન સ્નેચિંગ સહિતની ઘટનાઓ ખૂબ પ્રમાણ માં વધી રહી છે ત્યારે તેની સામે ડિટેક્શનનો રેશિયો ખૂબ ઓછો છે. કાગડાપીઠ પોલીસે ગઇ કાલે એક ઘરફોડ ચોરીના આરોપીને મુદ્દામાલ સાથે મહામહેનતે ઝડપી લીધો હતો. પોલીસ સ્ટેશનમાં લોકઅપનો અભાવ હોવાથી આરોપીને પીએસઓ ટેબલની પાછળ બેસાડ્યો હતો. પીએસઓ સહિતના પોલીસ કર્મચારીઓ જ્યારે કામ કરી રહ્યા હતા ત્યારે ઘરફોડ ચોરીનો આરોપી ઊભો થયો હતો અને ચૂપચાપ નાસી ગયો હતો.