પોલીસનું નાઈટ કોમ્બિંગઃ તસ્કરોએ હવે પેટર્ન બદલીને ધોળા દિવસે' ચોરી કરી

મણિનગરતાં વૃદ્ધા પ્રસંગમાં ગયાં ત્યારે તસ્કરોએ ઘરનું તાળું તોડી બે લાખની રોકડ સહિત પાંચ લાખના મુદ્દામાલ પર હાથ સાફ કર્યો

શિયાળો શરૂ થાય એટલે શહેરમાં ચોરીની ઘટનાઓ સૌથી વધુ બનતી હોય છે, જે પોલીસ માટે પણ માથાના દુખાવા સમાન છે. લોકો કાતિલ ઠંડીમાં રજાઇ ઓઢીને સૂઇ ગયા હોય ત્યારે તસ્કરો મેદાનમાં ઊતરે છે અને પોતાના બદઇરાદાઓને અંજામ આપતા હોય છે. પોલીસ ચોરીની ઘટના રોકવા માટે એડીચોટીનું જોર લગાવતી હોય છે તેમ છતાંય તસ્કરો ચોરી કરીને જતા રહે છે.

તસ્કરોએ પોલીસને દબંગ અવતારમાં જોતાંની સાથે જ પોતાની પેટર્ન બદલી નાખી છે. શહેરને પોલીસ છાવણીમાં ફેરવીને મોડી રાતે કોમ્બિંગ કરવામાં આવી રહ્યું છે, જેના કારણે તસ્કરોએ હવે ધોળા દિવસે લોકોનાં ઘરનાં તાળાં તોડવાનું શરૂ કર્યું છે. તસ્કરો મણિનગર ની એક સોસાયટીમાં ધોળા દિવસે પાંચ લાખની મતાની ચોરી કરીને ફરાર થઇ ગયા છે, જેને લઇને પોલીસ પણ અંચબામાં મુકાઇ ગઇ છે.