વહેલી સવારે ઠંડા પવનોએ લોકોને ધ્રુજાવી દીધાઃ પાંચ ડિગ્રી સાથે નલિયા ‘ઠંડુગાર'

રાજકોટમાં સિઝનમાં પહેલી વાર ઠંડીનો પારો ૧૦ ડિગ્રીથી નીચે ગગડીને ૯.૭ ડિગ્રીએ પહોંચ્યો

અમદાવાદ સહિત રાજ્યભરમાં ગાત્રો થિજાવતી કડકડતી ઠંડી શરૂ થતાં જ લોકો ધ્રુજી ઊઠ્યા છે. છેલ્લા બે દિવસથી રાજ્યમાં બરફીલા પવન ફૂંકાતાં જનજીવન ભારે પ્રભાવિત થયેલું જોવા મળી રહ્યું છે. લોકો વહેલી સવારે અને સાંજે ઠંડી સામે રક્ષણ મેળવવા માટે તાપણાં અને ગરમ કપડાંનો સહારો લેતા દેખાઈ રહ્યા છે. આજે વહેલી સવારે ફૂંકાયેલા ઠંડાગાર પવનોએ લોકોને સિઝનની સૌથી ઠંડી સવારનો અનુભવ કરાવ્યો હતો. છેલ્લા ૨૪ કલાક દરમિયાન રાજ્યના મોટા ભાગના વિસ્તારોનું લઘુતમ તાપમાન નીચે ગગડ્યું છે. કચ્છના નલિયામાં તો આજે સવારે પાંચ ડિગ્રી ઠંડી નોંધાતાં નલિયાવાસીઓ થથરી ઊઠ્યા હતા, બીજી તરફ સૌરાષ્ટ્રમાં કોલ્ડવેવની શક્યતા વચ્ચે રાજકોટમાં પણ ઠંડીનો પારો ગગડતાં સિઝનનું સૌથી ઓછું ૯.૭ ડિગ્રી તાપમાન નોંધાયું હતું અને રાજકોટવાસીઓ ઠૂંઠવાઈ ગયા હતા. રાજકોટમાં આ સિઝનમાં પહેલી વાર ઠંડીનો પારો ૧૦ ડિગ્રીથી નીચે ગગડ્યો છે.