રામોલ પોલીસને હરિયાણામાં અકસ્માત નડ્યોઃ બે પોલીસકર્મી સહિત ત્રણનાં મોત, PSI ઘાયલ

ડ્રાઈવરને ઝોકું આવતાં ગમખ્વાર અકસ્માત સર્જાયો હોવાનું પ્રાથમિક તપાસમાં ખૂલ્યું

આજનો દિવસ પોલીસ ડિપાર્ટમેન્ટ માટે ગોઝારો સાબિત થયો છે. કેસની તપાસ માટે જઇ રહેલા પોલીસ કર્મચારીઓને હરિયાણા ખાતે અકસ્માત નડ્યો છે, જેમાં બે પોલીસ કર્મચારી સહિત ત્રણ લોકોનાં મોત થયાં છે, જ્યારે પીએસઆઇ ગંભીર રીતે ઘાયલ થયા છે.

ગુજરાત સહિત દેશના હાઇવે અકસ્માતના કારણે અનેક વખત રક્તરંજિત થતા હોય છે, જ્યારે આજે પણ વહેલી પરોઢે પોલીસની કારનો અકસ્માત થતાં પોલીસ વિભાગમાં સન્નાટો વ્યાપી ગયો છે. પોક્સો એક્ટ હેઠળ નોંધાયેલા બળાત્કાર કેસની તપાસ કરવા માટે રામોલ પોલીસ સ્ટેશનના પીએસઆઇ, બે કોન્સ્ટેબલ અને ડ્રાઇવર હરિયાણા જઇ રહ્યા હતા, જ્યાં તેમને અકસ્માત નડ્યો હતો.

પોલીસવાનનો કૂચો વળી ગયો હતો, જ્યારે ત્રણ લોકોનાં ઘટનાસ્થળે મોત થયાં છે અને પીએસઆઇ ઘાયલ થયા છે. અકસ્માત કોણ કર્યો તે મામલે હરિયાણા પોલીસે તપાસનો ધમધમાટ શરૂ કર્યો છે. ડ્રાઇવરને ઝોકું આવતાં અકસ્માત થયો હોવાનું પ્રાથમિક તપાસમાં જાણવા મળ્યું છે.