முழு ஆற்றலை அடைய இளையர்களுக்கு உதவிக்கரம்

சிங்கப்பூரில் வேலை, கல்வி, பயிற்சி என எதிலும் ஈடுபடாத 15 வயதுக்கும் 24 வயதுக்கும் இடைப்பட்ட இளைஞர்களின் எண்ணிக்கை 2023ஆம் ஆண்டில் கிட்டத்தட்ட 17,000ஆக இருந்தது.

- கி. ஜனார்த்தனன்

மனிதவள அமைச்சு வெளியிட்ட 2024 ஊழியரணி ஆய்வின் மூலம் இந்தத் தரவுகள் கிடைக்கப்பெற்றன. முன்னதாக, 2013ல் 3.7ஆக இருந்த இப்பிரிவினரின் விழுக்காடு, பத்தாண்டுகள் கழித்து 4.1 விழுக்காடாக உயர்ந்தது.

இவ்வாறு தங்களது முழு ஆற்றலை அறிந்திடாமல் ‘மறைந்து’ வாழும் இந்த இளைஞர்கள், சமூகத்திலிருந்து விலகி, வீட்டிலேயே தங்களைத் தனிமைப்படுத்திக்கொண்டு, முக்கியமான நேரடித் தொடர்புகளை அமைக்காமலும் வளர்ச்சி வாய்ப்புகளைப் நாடாமலும் ஒரு தேக்க நிலையில் உள்ளனர்.

இந்தக் குறிப்பிட்ட இளைஞர் பிரிவினர் தங்களைப் பற்றித் தாழ்வாக எண்ணுவர்; பிறருடன் பழகும் திறன்களைக் கொண்டிருக்கமாட்டர்; நண்பர்களுடன் மற்றும் பெற்றோருடன் நல்லுறவு வளர்த்துக்கொள்ளமாட்டர். அத்துடன் பள்ளியிலும் சிறப்பாகச் செய்ய முடியாத நிலையில் இருக்கலாம். இதனாலேயே இவர்கள் இணைய உலகுக்குள் சென்று விடுவர். சமூகத்தை விட்டு விலகி தங்களைத் தனிமைப்படுத்திக்கொள்வர்.