அலங்கார நாயகர்களான வெளிநாட்டு ஊழியர்கள்

வெளிநாட்டு ஊழியர்களை கட்டுமானத் தளங்களிலும் தொழிற்பேட்டைகளிலும் பணிபுரிவோர் என்ற கண்ணோட்டத்தில் மட்டும் பார்க்காமல் அவர்களைத் தனித்துவமிக்கவர்களாக சிங்கப்பூரர்கள் கருதுவதை ஊக்குவிக்கிறோம் என்கிறது ஐஆர்ஆர்.

மதுராஜன் பிரகாஷ். 27 வயதாகும் இவர் இந்தியாவைச் சேர்ந்தவர்.

மின்னியல் மேற்பார்வையாளராகப் பணியாற்றும் இவர், வேலைநாள்களில் வழக்கமாக நிறுவனச் சீருடையில் வேலைபார்ப்பார்.

ஆனால் கடந்த ஞாயிற்றுக்கிழமை (அக்டோபர் 27) புத்தாடைகள், கண்கவர் காலணிகள், தோளில் அலங்காரப் பை என இவரது தோற்றமே மாறியிருந்தது.

செம்பவாங் பொழுதுபோக்கு நிலையத்தில் முகத்தில் பெருமை மிளிர, படக்கலைஞர்களின் கேமராக்களுக்குப் புன்னகை சிந்தி நின்றிருந்தார் பிரகாஷ்.

வெளிநாட்டு ஊழியர் நலனுக்கான அறநிறுவனமான ‘இட்ஸ்ரெயினிங்ரெயின்கோட்ஸ்’ (ஐஆர்ஆர்) அமைப்பு ஏற்பாடு செய்த நிகழ்ச்சியில் பிரகாஷைப் போன்ற வெளிநாட்டு ஊழியர்கள் மொத்தம் 10 பேர் அலங்கார நாயகர்களாகப் பவனிவந்தனர்.