டிரம்ப் மீண்டும் அதிபர்

நான்கு ஆண்டுகளுக்குப் பின் மீண்டும் அரியணை; அமெரிக்க வரலாற்றில் 132 ஆண்டு சாதனை

அமெரிக்க அதிபர் தேர்தலில் டோனல்ட் டிரம்ப் வாகை சூடியுள்ளார். இதனையடுத்து, இரண்டாம் முறையாக அவர் அமெரிக்க அதிபராகப் பதவி ஏற்கவுள்ளார்.

ஒரு தொடர்ச்சியாக இருமுறை பதவி வகிக்காமல், தவணை இடைவெளிக்குப் பிறகு, 132 ஆண்டுகளுக்கு முன்னால் குரோவர் கிளீவ்லேண்ட் அதிபரானார். அதற்குப் பிறகு டிரம்ப் அந்தச் சாதனைக் குச் சொந்தக்காரர் ஆகிறார்.

ஃபுளோரிடாவில் தம் ஆதரவாளர்களுக்கு மத்தியில் உரையாற்றிய டிரம்ப், "அமெரிக்கா நமக்கு எதிர்பாராத, வலுவான அதிகாரம் வழங்கியுள்ளது," என்றார்.

தாம் தேர்தலில் வென்று, மீண்டும் அதிபராகத் தேர்ந்தெடுக்கப்பட்டுள்ளதை ‘வரலாற்றின் ஆகச் சிறந்த அரசியல் நிகழ்வு’ என்று அவர் குறிப்பிட்டார்.

எட்டாண்டுகளுக்கு முன் நாட்டின் 45ஆவது அதிபராகவும், இப்போது 47ஆவது அதிபராகவும் தம்மைத் தேர்வுசெய்துள்ள அமெரிக்க மக்களுக்கு டிரம்ப் நன்றி கூறிக்கொண்டார்.

உண்மையிலேயே “இது அமெரிக்காவின் பொற்காலமாக இருக்கும்," என்றார் 78 வயதான டிரம்ப்.