ஊழியர்களை வெளிநாட்டுக்கு அனுப்பும் நிறுவனத்திற்கு ஆதரவு

வெளிநாடுகளுக்கு விரிவுபடுத்த விரும்பும் நிறுவனங்கள் சிங்கப்பூர் ஊழியரணி அமைப்பின் (WSG) புதிய திட்டத்தின்கீழ் ஊழியர்களை வெளிநாடுகளுக்கு அனுப்புவதற்கு S$72,000 வரை சம்பளம் மற்றும் ஊக்கத் தொகை ஆதரவு பெறலாம்.

வெளிநாட்டுச் சந்தைகள் ஈடுபாட்டுத் திட்டத்தின் (Overseas Markets Immersion Programme) கீழ், நிறுவனங்கள் 70% சம்பளம் மற்றும் ஊக்கத்தொகை ஆதரவைப் பெறலாம். அவை முறையே, வெளிநாட்டுப் பணிக்கு அனுப்ப தகுதியுள்ள ஒவ்வோர் ஊழியருக்கும் S$5,000 மற்றும் S$3,000 என மாத வரம்புடன், ஒன்பது மாதங்கள் வரை வழங்கப்படும்.

இதற்குத் தகுதி பெற, நிறுவனங்கள் குறைந்தபட்சம் S$4,000 நிலையான மாதச் சம்பளத்தை வெளிநாட்டிற்கு அனுப்பப்படும் ஊழியர்களுக்கு வழங்க வேண்டும் என்று சிங்கப்பூர் ஊழியரணி அமைப்பு நவம்பர் 15ஆம் தேதி ஓர் அறிக்கையில் தெரிவித்துள்ளது.

அவர்கள் அடுத்த 24 மாதங்களில் அடையக்கூடிய முன்னேற்றத்தை கோடிட்டுக் காட்டும் விரிவான தொழில் மேம்பாட்டுத் திட்டத்தையும், பயிற்சிக்குப் பிறகு அடையக்கூடிய குறுகியகால முக்கிய செயல்திறன் அடைவுநிலைகளையும் வழங்க வேண்டும்.