2024ல் முத்திரை பதித்த முத்துகள்

ஒவ்வோர் ஆண்டும் இருநூறுக்கும் மேற்பட்ட படங்கள் வருகின்றன.

எத்தனையோ இயக்குநர்கள், இசையமைப்பாளர்கள், நடிகர்கள், நடிகைகள் அவர்களது திறமைகளை வெளிப்படுத்துகிறார்கள். ஆனால், அனைவருக்கும் சிறந்த படங்கள் அமைந்துவிடுவதில்லை. சிலருக்குத்தான் அப்படி அமைகின்றது. அப்படி அமைவதிலும் ஒரு சிலர் மட்டுமே சரியான முத்திரையைப் பதித்து முத்துகளாய் ஒளிர்கிறார்கள். அந்த விதத்தில் இந்த ஆண்டு இயக்கம், இசை, நாயகன், நாயகி, கதையின் நாயகன் என முத்திரை பதித்த சில முத்துகள் உங்கள் பார்வைக்கு.

இயக்கம் - தமிழரசன் பச்சமுத்து

2024ஆம் ஆண்டிலும் வழக்கம் போல நிறைய புதுமுக இயக்குநர்கள் அறிமுகமானார்கள். அவர்களில் அதிகம் பேசப்பட்ட இயக்குநராக ‘லப்பர் பந்து’ படத்தின் மூலம் இயக்குநராக அறிமுகமான தமிழரசன் பச்சமுத்து இருந்தார்.

ஒரு தரமான படத்திற்கு நட்சத்திரத் தகுதி தேவையில்லை, தரமான கதை இருந்தாலே போதும் என நிரூபித்து வெற்றி பெற்றுள்ளார். அட்டகத்தி தினேஷ், இந்தப் படம் மூலம் கெத்து தினேஷ் என்றழைக்கப்படும் அளவிற்குப் பெயர் வாங்கிவிட்டார்.

ஹரிஷ் கல்யாண், சஞ்சனா கிருஷ்ணமூர்த்தி, ஸ்வாசிகா என படத்தில் நடித்துள்ள மற்றவர்களும் அவர்களது கதாபாத்திரங்களால் பேசப்பட்டார்கள். இப்படியான நடிகர்கள், நடிகைகளை வைத்து அனைவரும் கொண்டாடும் ஒரு படத்தைக் கொடுத்து இருக்கிறார் தமிழரசன் பச்சமுத்து.

இசை - ஜி.வி. பிரகாஷ்குமார்

2006ல் வெளிவந்த ‘வெயில்’ படம் மூலம் இசையமைப்பாளராக அறிமுகமானவர் ஜி.வி பிரகாஷ்குமார். கடந்த 18 ஆண்டுகளில் எத்தனையோ வெற்றிப் படங்களுக்கு இசையமைத்திருக்கிறார்.