మలుపు తిప్పే భయం మంచిదే

చదువుకునే విద్యార్థులకు పరీక్షలంటే భయం. ఇంటర్వ్యూలో కూర్చున్న నిరుద్యోగికి ఉద్యోగంలో సెలక్ట్ అవుతానా, లేదా? అనే టెన్షన్, భయం వెంటాడుతుంది.

- - దాసరి శివకుమారి

చదువుకునే విద్యార్థులకు పరీక్షలంటే భయం. ఇంటర్వ్యూలో కూర్చున్న నిరుద్యోగికి ఉద్యోగంలో సెలక్ట్ అవుతానా, లేదా? అనే టెన్షన్, భయం వెంటాడుతుంది. పిల్లలు క్షేమంగా ఇంటికి చేరుకునేంతవరకు తల్లిదండ్రుల్లో టెన్షన్, భయం. టార్గెట్ పూర్తి చేయకపోతే ఉద్యోగం ఉంటుందో ఊడుతుందో భయం.. ఇలా ప్రతి ఒక ఏదో ఒక సందర్భంలో భయానికి గురవుతూనే ఉంటారు. అయితే కొన్ని భయాలు కెరీర్ను మలుపుతిప్పితే, మరికొన్ని భయాలు వైఫల్యాలను చవి చూసేవిగా మిగిలిపో తుంటాయి. కాబట్టి భయం అనేది ఉండటం మంచిదే కానీ, అది అన్నీ వేళలా మంచిది కాదు. ఇలాంటి భయాల మంచిచెడుల గురించి గమనిద్దాం.

ప్రతి మనిషిలో అన్ని కోణాలూ వుంటాయి. కొన్ని గుణాలూ ఉంటాయి. ఉదాహరణకు భయం, కోపం, శాంతం, కరుణ వగైరా. మనిషికి భయం వుండాలి. కాని అది మోతాదుకు మించి వుండకూడదు. మనిషికే కాదు పశుపక్షులకు కూడా భయం అనేది కాస్తో కూస్తో వుండాలి. రౌతు మెత్తనైతే గుఱ్ఱం మూడుకాళ్లమీద నడుస్తుందన్న సామెత వుండనే వున్నది.కాబట్టి పశువులకు కూడా దెబ్బ భయం వుండాలి. మొరిగే కుక్కలు కూడా కర్రచూపిస్తే వెనక్కు తిరిగి పారిపోతాయి.అవి మొరిగినపుడు మనం భయపడి పరుగెత్తితే అవి మనల్ని వెంటబడి తరుముతాయి. అలా అని నిర్భయంగా ఊరుకుని కరిపించుకోకుండా జాగ్రత్త పడాలి. చదువుకునే పిల్లల విషయానికొస్తే పరీక్షలొచ్చినప్పుడు భయపడి జ్వరం తెచ్చుకునే పిల్లలుంటారు. అలాంటపప్పుడు పెద్దవారు కలగజేసుకోవాలి.'ఈ పరీక్షలు ఎప్పుడూ, వస్తూనే వుంటాయి. నువ్వు బాగా చదువుతావు కాబట్టి పరీక్షలు కూడా బాగా రాస్తావు. వాటికి నువ్వు భయపడేదేమిటి? చూడు నీకు ఎంత మంచి మార్కు లొస్తామో' అని చెప్పి భయం పోగొట్టాలి. మరికొంతమంది పిల్లలు పరీక్షలొచ్చినా ఏమాత్రం భయం లేకుండా నిర్లక్ష్యంగా వుంటారు. అప్పుడూ పెద్దవారే కలగజేసుకోవాలి. పరీక్షలొ స్తుంటే ఏమాత్రం భయం లేదేమిటి? ఈ పరీక్షలన్నింటిలో మంచిమార్కులొస్తే వీటన్నింటిని చూసే నీకు ఫైనల్గా గ్రేడ్ ఇస్తారు. కాబట్టి ఎప్పటికప్పుడు జాగ్రత్తగా చదవాలి' అని చెప్పి భయపెట్టాలి.