'కవిభూషణ' ఆచార్య దివాకర్ల వేంకటావధాని

సాహిత్యం

- జయసూర్య

తెలుగు సాహితీయానంలో  అధ్యయన, అధ్యాపక ప్ర సాహితీవేత్తగా, ఆచార్య దివాకర్ల వేంకటావధాని జగమెరిగిన మహా పండితులు. విద్వత్తు, ధారణ, పాండితీ ధోరణిలో అచ్చమైన తెలుగుదనం రూపు కట్టిన ఆచార్యునిగా ఆదర్శనీయ వ్యక్తిత్వంతో అవధాని శబ్దాన్ని సార్థకం చేసుకొన్న విద్యా విశారదుడు. 1934లో విశాఖపట్నంలో తెలుగు పండితునిగా తొలి దశ నుంచి దివాకర్లవారు, అధ్యయన, అధ్యాపక, ప్రతిభా సంపన్నునిగా ఆంధ్ర, ఉస్మానియా విశ్వవిద్యాలయాలలో తెలుగు భాషా బోధన విద్యా రంజకంగా కొనసాగించారు. ఉస్మానియాలో 27 సంవత్సరాలు ఉపన్యాసకునిగా, రీడర్, ఆచార్య, శాఖాధ్యక్ష, డీన్గా పదవీ బాధ్యతలు నిర్వర్తించిన దివాకర్ల ఎందరికో ఆదర్శనీయంగా ఎన్నో దివ్వెలు వెలిగించి తెలుగు సాహితీ వెలుగులు ప్రసరింపచేసారు. ఉపన్యాసాల రూపేణా పండితులకే కాదు పామరులకు కూడా తెలుగు సాహిత్యంలోని మాధుర్యాన్ని కళాత్మక ప్రతిభా సమన్వితంగా చాటి చెప్పి, సాహితీ సరస్వతిని ఆరాధించారు.

'ఆంధ్ర వాఙ్మయారంభ దశ నన్నయ భారతం' అనే అంశం మీద 1957లో పిహెచ్ డి పొందిన దివాకర్ల, తన సిద్ధాంత వ్యాసంలో ప్రాఙ్నన్నయ యుగం, నన్నయ భారతం రెండు సంపుటాలుగా ఎన్నో అమూల్య అంశాలు వెలుగులోకి తెచ్చారు. ఆదికవి నన్నయ అంటే ఆయనకు ఆరాధనాభిమానాలుండేవి.ఆచార్య దివాకర్ల వ్యాసం, ఉపన్యాసం రెండు నేత్రాలుగా ప్రాచీన కవుల కావ్య మాధుర్యాన్ని, శిల్ప నైపుణ్యాన్ని పరిశోధనాత్మకంగా అధ్యాపక ఆదర్శంతో ఎందరికో మార్గదర్శకులయ్యారు.