బాధ్యత

ఆ రోజు  కుటుంబం ఎంతో సంతోషంగా ఉంది. దానికి కారణం.. వాళ్లు కలలుగన్న సొంతింటి కల నెరవేరిన రోజది.

- చలపాక ప్రకాష్

ఆ రోజు  కుటుంబం ఎంతో సంతోషంగా ఉంది. దానికి కారణం.. వాళ్లు కలలుగన్న సొంతింటి కల నెరవేరిన రోజది. ఆ రోజే గృహ ప్రవేశం చేసి వేడుక చేసుకున్నారు వాళ్లు.

సాయంత్రమైంది. ఆ ఆనందంలో ఆ ఇంటి పెద్దయిన సంజయ్కి ఎందుకో గుడికి వెళ్లాలనిపించింది. అనుకున్నదే తడవుగా తన కుటుంబ సభ్యులందరితో గుడికి ప్రయాణమయ్యాడు. ఎందుకోగాని గుడులన్నీ కొండపైనే ఉంటాయి.బహుశా కిందుంటే దొంగల బారి నుండి రక్షణ ఉండదనేమో! ఎలాగైతేనేం కొండ పైనున్న గుడికి కాలినడకతో వెళ్లారు ఆ కుటుంబమంతా. మనసుకు హాయిగా ఉంది వాళ్లకి. బహుశా, ఆనందంతో కూడిన మనస్సు ప్రశాంతత వల్లనుకుంటా!

"డాడీ! ఈ పుస్తకం కొనుక్కుంటా!” అంది సంజయ్ పెద్దకూతురు సంధ్య అక్కడ ఉన్న పుస్తక విక్రయశాలలో చూస్తూ.

"ఏం పుస్తకమంది?" అడిగింది సంజయ్ భార్య శ్రీలేఖ.

“రామకోటి”

"రామకోటి పుస్తకమా! నీ వయస్సు పిల్లలకి అవి ఎందుకు? పెద్ద వయస్సు వాళ్లు రాసేవి అవి!" అంది శ్రీలేఖ కూతుర్ని ఉద్దేశించి.

"నేను రాస్తానమ్మా రామకోటి” అంది సంధ్య భక్తిగా.

“అలాగే అంటావు. సగంలో రాసి మానేస్తే..." మధ్యలో సంజయ్ అందుకుని అన్నాడు.

"పిల్లల్ని ఎంకరేజ్ చెయ్యాల్సిందిపోయి అలా డిజప్పాయింట్ చేస్తారేమిటండీ మీరు అలా పిల్లల్లో భక్తిభావం ఎలా పెరుగుతుంది?" శ్రీలేఖ కోపంగా అంది సంజయ్ను ఉద్దేశించి.