అన్నమయ్య పదాలు

తెలుగు పలుకుబడిలోని తేటతనాన్ని పుక్కిట పట్టిన అన్నమయ్య, అచ్చతెనుగు నుడికారంతో సృష్టించిన పద సాహిత్య మాధుర్యం, సంకీర్తనా పరంగా వేంకటేశ్వర భక్తితత్త్వంగా వెల్లివిరుస్తోంది.

- జయసూర్య

నాలుగు వందల యేళ్లకు పైగా  అన్నమాచార్యుని అద్భుత సాహిత్యం వెలుగు చూడకపోవడం తెలుగువారి దౌర్భాగ్యం. ఎట్టకేలకు రాగిరేకులపై భద్రపరచబడిన ఆ పద కవితా ప్రక్రియ 75 యేళ్ల క్రితం తిరుమల తిరుపతి దేవస్థానం సారధ్యంలో క్రమేపీ అన్నమాచార్య ప్రాజెక్ట్ సాహిత్యం, సంగీత మహనీయుల సత్కృషి సత్ఫలితంగా ప్రచారం పొందడం తెలుగువారి సౌభాగ్యం. తెలుగు పలుకుబడిలోని తేటతనాన్ని పుక్కిట పట్టిన అన్నమయ్య, అచ్చతెనుగు నుడికారంతో సృష్టించిన పద సాహిత్య మాధుర్యం, సంకీర్తనా పరంగా వేంకటేశ్వర భక్తితత్త్వంగా వెల్లివిరుస్తోంది. తాను విశ్వసించిన దేవదేవుడైన పరమాత్మ సన్నిధిలో యావజ్జీవితం కీర్తిస్తూ గడిపిన తొట్టతొలి వాగ్గేయకారునిగా అన్నమయ్య, తెలుగు పద సాహిత్యాన్ని పాటకు ఆద్యునిగా ఆరాధ్యనీయతతో సంపన్నవంతం చేసారు. పురందరదాసు, క్షేత్రయ్య, రామదాసు, త్యాగయ్య.. వీరంతా అన్నమయ్య తదనంతర వాగ్గేయకారులే.వాసిలోనూ, రాశిలోనూ అన్నమాచార్యునిదే అగ్రస్థానం.