కెరీర్లో సక్సెస్ సాధ్యమే

పేదరికం లక్ష్యసాధనకు అడ్డుకాదని నిరూపించాడు ఒక యువకుడు.

- డాక్టర్ ఎన్.బి.సుధాకర్రెడ్డి, సైకాలజిస్టు

పేదరికం లక్ష్యసాధనకు అడ్డుకాదని నిరూపించాడు ఒక యువకుడు. సంకల్పబలంతో అత్యున్నత స్థితిని అందిపుచ్చుకున్నాడు. సానుకూల దృక్పధం జీవం పోసింది. గుణసంపద బాట వేసింది. ఆత్మగౌరవం వెన్నుతట్టింది. ఆత్మవిశ్వాసం నడిపించింది. సివిల్స్ ర్యాంకు స్వంతం  అయ్యింది. ప్రకాశం జిల్లా సింగరాయకొండ మండలం, ఊళ్లపాల్యానికి చెందిన ఉదయకృష్ణారెడ్డి చిన్నతనంలోనే తల్లిదండ్రులను కోల్పోయాడు. ఆయన నాన్నమ్మ కూరగాయలు అమ్మి చదివించింది. ప్రభుత్వ పాఠశాల, కళాశాలల్లో, డిగ్రీవరకు చదివాడు. నాన్నమ్మను కష్టపెట్టడం ఇష్టంలేక పోలీస్ కానిస్టేబుల్ ఉద్యోగంలో చేరాడు. అయితే స్కిల్ ఇన్స్పెక్టర్ అవమానించడంతో ఉద్యోగానికి రాజీనామా చేశాడు.2019 నుంచి సివిల్స్ సాధనపై దృష్టిపెట్టాడు.

నాలుగవ ప్రయత్నంలో 780వ ర్యాంకు సాధించి వార్తలకు ఎక్కాడు. తెలంగాణకు చెందిన దోనూరు అనన్య సివిల్స్ లో మొదటి ప్రయత్నంలోనే మూడవర్యాంకు సాధించింది. మహబూబ్ నగర్ జిల్లాలో పుట్టిన ఆమె రోజుకు 12-14 గంటలు చదివి లక్ష్యాన్ని చేరుకున్నది. ఆంత్రోపాలజీకి మాత్రమే కోచింగ్ తీసుకున్నది. మిగిలిన అంశాలు స్వంతంగా చదివి ఆకలింపు చేసుకున్నది. సివిల్స్ అంటే అందని ద్రాక్షేమీ కాదని నిరూపించింది.మేధస్సులో మహిళలు తక్కువ కాదని లోకానికి చాటింది. అందరికి ఆదర్శంగా నిలిచింది.పెద్దపల్లి జిల్లా గోదావరిఖనికి చెందిన కూనారపుసిరి ఇంటర్ సీఈసీలో 927 మార్కులు సాధించింది. సహజం. ఇందులో గొప్పేముంది అనుకుంటారు. అయితే ఆమె తీవ్రమైన అనారోగ్యాన్ని ఎదుర్కొని మార్కులు సాధించడం చూస్తే ఆశ్చర్యం కలుగుతుంది. ఆమె ఐదేళ్లుగా మూత్రపిండాల వ్యాధితో బాధపడుతోంది. గత ఎనిమిది నెలల క్రితం రెండు కిడ్నీలు పూర్తిగా చెడిపోవడంతో వారానికి రెండుసార్లు డయాలసిస్ చేయించుకుంటోంది. చదువుపై ఆసక్తితో కష్టపడి చదివింది. కాలేజీకి వెళ్లకపోయినా స్మార్ట్ఫోన్లోనే చదువుతూ మంచిమార్కులు సాధించింది.

లక్ష్యం నడిపిస్తుంది