బడులకు సిద్ధం..ఫీజుల యుద్ధం!

నూతన విద్యా సంవత్సరం 2024-25లో విద్యార్థులు సంతోషంగా అడుగు పెడుతున్నారు. వేసవి సెలవుల్లో సెల్ఫోన్, గేమ్లు, మైదానాల్లో పరుగులు, వేసవి శిక్షణ శిబిరాల్లో బిజీగా గడిపిన పిల్లలను మళ్లీ స్కూళ్లకు పంపేందుకు తల్లిదండ్రులు సిద్ధమవుతున్నారు.

- వాసిలి సురేష్

వేసవి సెలవుల అనంతరం జూన్ బడులు 12న స్కూళ్లు తెరుచుకొంటున్నాయి. నూతన విద్యా సంవత్సరం 2024-25లో విద్యార్థులు సంతోషంగా అడుగు పెడుతున్నారు. వేసవి సెలవుల్లో సెల్ఫోన్, గేమ్లు, మైదానాల్లో పరుగులు, వేసవి శిక్షణ శిబిరాల్లో బిజీగా గడిపిన పిల్లలను మళ్లీ స్కూళ్లకు పంపేందుకు తల్లిదండ్రులు సిద్ధమవుతున్నారు.

ఉత్సాహంగా, రెట్టింపు ఆసక్తితో పిల్లలు పాఠశాలలకు వెళ్లేలా మానసికంగా సిద్ధం చేస్తున్నారు. మొదటి రోజే ఎలాగైనా స్కూలుకు వెళ్లాలని సూచిస్తున్నారు. అదే ఉత్సాహాన్ని సంవత్సరమంతా కొనసాగించాలని కోరుకొంటున్నారు. పిల్లల్లో ఉత్సాహం నింపేందుకు చాలామంది తల్లిదండ్రులు కొత్త బ్యాగ్, లంచ్ బాక్సులు, వాటర్ బాటిళ్లు ఇప్పిస్తూ పిల్లలను ప్రోత్స హిస్తున్నారు.

వేసవి సెలవుల తర్వాత స్కూళ్లు పునః ప్రారంభం అవుతాయంటే స్కూలుకెళ్లే చిన్నారుల్లో సాధారణంగా ఉత్సాహం కనిపిస్తుంది. కారణం పై తరగతులకు వెళ్తున్నప్పుడు స్కూల్ యూనిఫాం దగ్గర్నుంచి పుస్తకాల దాకా అన్నీ కొత్త వస్తువులు కొనిస్తారనే ఆనందమే వారిలో ఎక్కువగా ఉంటుంది. అయితే ఈ క్రమంలో స్కూల్ బ్యాగ్, లంచ్ బాక్సులు, పుస్తకాలు, నోట్బుక్స్ వంటివి కొనిచ్చేటప్పుడు తల్లిదండ్రులు పిల్లలను తీసుకెళ్లి వారికి నచ్చినవి కొనివ్వడం మంచిది. దీని ద్వారా వారిలో కొత్త ఉత్సాహం కలగడంతో పాటు ఏ వస్తువు ఎలా కొనాలన్న విషయమూ చిన్నతనం నుంచే అలవడుతుంది.

ఇలా తమకు నచ్చిన వస్తువులతో ఇష్టపూర్వకంగా స్కూలుకెళ్లడం, వాటిని తమ తోటి స్నేహితులకు చూపిస్తూ ఆనందపడడం, ఆ తర్వాత ఇంటికొచ్చి ఆ ఆనందాన్ని, స్నేహితుల ప్రతిస్పందన మరెంతో సంతోషంగా తల్లిదండ్రులతో పంచుకోవడం జరుగుతుంది. దీంతో తల్లిదండ్రులకు సంతృప్తి కలుగుతుంది.