કેવો હોય બાળકોનો ઈમ્યૂનિટી ડાયટ

મોટા થતા બાળકોને આહારમાં કયાકયા પોષક તત્ત્વો આપવા જોઈએ જેનાથી તેમનો સંપૂર્ણ વિકાસ થાય, તે વિશે અચૂક જાણો..

અન્નપૂર્ણા અને પ્રીતિ બંને પોતાના બાળકોને પાર્કમાં ફરવા માટે લઈને આવી હતી. અન્નપૂર્ણાનો દીકરો મયંક એક તરફ બાળકોની બધી એક્ટિવિટી અને ગેમમાં ભાગ લઈ રહ્યો હતો અને વિજયી બની રહ્યો હતો, જ્યારે બીજી તરફ તેનાથી ૧ વર્ષ મોટો પ્રીતિનો દીકરો કિંચિત થોડું રમીને થાકી ગયો હતો અને એક ખૂણામાં બેઠેલા એક ગલુડિયાને પરેશાન કરવામાં મશગૂલ હતો.

પ્રીતિએ ઉદાસ સ્વરમાં અન્નપૂર્ણાને પોતાનું દુખ સંભળાવતા કહ્યું, “યાર અનુ, તારો દીકરો ઘણો સ્ટ્રોંગ છે. તેને જ્યારે પણ જોઉં છું તે હંમેશાં એક્ટિવ દેખાય છે અને દરેક વસ્તુમાં પ્રથમ રહે છે, પરંતુ મારા દીકરાનું ક્યાંય મન લાગતું નથી. તે ખૂબ જલદી થાકી જાય છે અને તેનો ગ્રોથ યોગ્ય રીતે નથી થઈ રહ્યો. મને લાગે છે કિંચિત ઉંમરમાં મોટો છે, પરંતુ ઊંચાઈમાં મયંક તેનાથી મોટો લાગે છે.’’

‘‘હા યાર, તારી વાત સાચી છે કે મારો દીકરો બધી જગ્યાએ પ્રથમ આવે છે અને તેનું કારણ એ છે કે મેં શરૂઆતથી જ તેના આહાર પર ધ્યાન આપ્યું હતું. હું તેને હંમેશાં સારો ડાયટ આપું છું.’’ અન્નપૂર્ણાએ કહ્યું.

“પરંતુ મારો દીકરો ખાવામાં એટલા નખરા કરે છે કે તને શું કહું. મુશ્કેલીથી બેત્રણ વસ્તુ ખાય છે, પરંતુ હા, જંક ફૂડ્સ ગમે તેટલા આપો ખુશીખુશી ખાઈ લે છે. તેથી હું તેને ખાવામાં પિઝા, બર્ગર, ફ્રેંચ ફ્રાઈસ આપી દઉં છું. આખરે તેનું પેટ મારે ભરવાનું છે ને, તેથી તે ખાય છે તે જ તેને ખવડાવી દઉં છું.’’ પ્રીતિએ ચિંતિત સ્વરમાં કહ્યું.

"પરંતુ આ યોગ્ય નથી પ્રીતિ. આ બધું ખાવાથી તેને યોગ્ય પોષણ નહીં મળે. જો તું તેનું પોષણનું ધ્યાન નહીં રાખે તો આગળ જતા તેનો શારીરિક માનસિક વિકાસ અવરોધાશે. નાની ઉંમરથી તે બીમારીનો શિકાર બનશે. બાળક જિંદ કરીને જે કંઈ ખાવા ઈચ્છે તે તેને આપી દેવું યોગ્ય નથી. તેમને એવી વસ્તુ ખવડાવવી જોઈએ, જે તેમના પોષણ માટે જરૂરી હોય.’’ અન્નાપૂર્ણાએ સમજાવ્યું.

“અને જો તે ન ખાય તો?’’ અન્નપૂર્ણાએ દુખી સ્વરમાં કહ્યું.