పిల్లలతో పొదుపు చేయించడమెలా?

పిల్లల్లో దుబారా ఖర్చు తగ్గించి వారికి డబ్బు విలువ తెలియ చెప్పేందుకు మీకు పనికి వచ్చే చిట్కాలు...

- - రాజేష్

జీవితంలో డబ్బు ఎంత ముఖ్యమో, మనీ మేనేజ్మెంట్ కూడా అంతే ముఖ్యం. జీవితంలో ఇది ప్రతి మనిషి నేర్చుకోవాల్సిన అంశమని, ఒక పెద్ద శాస్త్రమని వారికి అర్థం అయ్యేలా చేయాలి.అలా చేసి వారు దుబారా ఖర్చులు తగ్గించుకుని, ఉన్న డబ్బులోంచి అవసరమైన ఖర్చులు మాత్రమే చేసు కొని మిగతాది పొదుపు చేయాలన్న విషయం గ్రహించేలా చేయవచ్చు.డబ్బు విలువను చిన్నప్పుడే మనం పిల్లలకు అర్థమయ్యేలా చెప్పాలి. అందుకోసం ఈ కింది చిట్కాలు మీకు చాలా ఉపయోగకరంగా ఉంటాయి. పొదుపు ప్రాముఖ్యతను అర్థం చేసుకున్న తర్వాత పిల్లలు డబ్బు విలువను అర్థం చేసుకుంటారు. వారి ఖర్చులలో చాలావరకు మార్పు వస్తుంది.

డబ్బు విలువను వివరించండి : ధరలు ఆకాశాన్నంటుతున్న ఈ రోజుల్లో పిల్లలకు డబ్బు విలువ తెలిసేలా చేయడం చాలా ముఖ్యం. డబ్బు సంపాదించడానికి మీరు రోజంతా చాలా కష్టపడాల్సి వస్తుందని వారికి అర్థమయ్యేలా చెప్పాలి. పిల్లలు అడిగిన దాన్ని కొనివ్వడం కోసం డబ్బులు సంపాయించాలంటే మీరు రోజుకు ఎన్ని గంటలు ఉద్యోగం చేస్తున్నారో లేదా మరో వ్యాపారం చేస్తున్నారో పిల్లలకి వివరించడానికి ప్రయత్నించండి. డబ్బులు దుబారా చేసే అలవాటు వల్ల మన అవసరాల కోసం తిరిగి అప్పులు చేయాల్సి వస్తుందని చెప్పాలి.