എഴുത്തിന്റെ നവപാതയിലേക്ക്

എഴുത്തിലും വായനയിലും സായൂജ്യം കാണുന്ന ജെ.ആർ. മീര എന്ന വിദ്യാർത്ഥിനിയെക്കുറിച്ച്...

- പി. ജയചന്ദ്രൻ

കൊല്ലം പട്ടത്താനത്തെ അമ്മൻനട മൈത്രീ നഗറിലെ "കാർത്തിക' എന്ന വീടിന്റെ ഉടമസ്ഥൻ രാജേഷ് സംസ്ഥാന റവന്യുവകുപ്പിൽ ഡെപ്യൂട്ടി തഹസീൽദാരാണ്. ഭാര്യ ജ്യോതിലക്ഷ്മി വൊക്കേഷണൽ ഹയർ സെക്കണ്ടറി സ്ക്കൂൾ അദ്ധ്യാപികയും. അതായത്, അത്യാവശ്യം തെറ്റില്ലാത്ത വരുമാനമുള്ള ദമ്പതികൾ എന്നുസാരം. എന്നിട്ടും അത്ര വലിയൊരു വീടൊന്നുമല്ല ഇവർക്ക്.

അതല്ല വിഷയം. ഇങ്ങനെ, അത്ര വലിയ സൗകര്യങ്ങളൊന്നുമില്ലാത്ത വീടായിട്ടു കൂടി അതിനുള്ളിൽ സാമാന്യം വലിയൊരു ലൈബ്രറിയുണ്ട് എന്നുള്ളതാണ്. നൂറുകണക്കിന് പുസ്തകങ്ങളുള്ള ലൈബ്രറി. മലയാളത്തിലേയും ഇംഗ്ലീഷിലേയും മിക്കവാറും പ്രസിദ്ധരായ എഴുത്തുകാരുടെയൊക്കെ കൃതികൾ കൊണ്ട് സമ്പന്നമായ ലൈബ്രറിക്ക് ഇപ്പോൾ വയസ്സ് അഞ്ചാകുന്നു. അതായത് രാജേഷിന്റെയും ജ്യോതി ലക്ഷ്മിയുടെയും ഏകമകൾ ജെ.ആർ. മീര എട്ടാം തരത്തിൽ പഠിക്കുമ്പോഴാണ്, അവളുടെ സ്നേഹപൂർവ്വമായ നിർബന്ധത്തിന് വഴങ്ങി രാജേഷും ജ്യോതിലക്ഷ്മിയും വീടിന്റെ മുകളിൽ സാമാന്യം വലിയൊരു ലൈബ്രറി ഒരുക്കിക്കൊടുത്തത്. അന്നത്തെ ആ എട്ടാം ക്ലാസുകാരി ഇന്നിപ്പോൾ പ്ലസ്ടൂക്കാരിയായെങ്കിലും, കേരളത്തിൽ ഒരു ലൈബ്രറി സ്വന്തമായുള്ള ഏറ്റവും പ്രായം കുറഞ്ഞ വിദ്യാർത്ഥി അന്നും ഇന്നും മീരയാണ്.

വെറുതെ ഒരു  ലൈബ്രറിയുണ്ടാക്കി മേനി നടിക്കുകയല്ല മീര ചെയ്യുന്നത്. ഇതിലുള്ള ഒട്ടുമിക്ക പുസ്തകങ്ങളും ഒരുവട്ടമെങ്കിലും മീര വായിച്ചു കഴിഞ്ഞതാണ്. വായിക്കാത്തവ വിരലിലെണ്ണാവുന്നവ മാത്രവും.

എഴുത്തിന്റെ വഴിയിലും...