എത്രകൊണ്ടാലും പഠിക്കില്ല!!

സൈബർ കുറ്റകൃത്യങ്ങൾ

- ജഗദീഷ് ഇൻസ്പെക്ടർ ഓഫ് പോലീസ്, സൈബർ ക്രൈം പോലീസ് സ്റ്റേഷൻ, കോട്ടയം

പരിഷ്ക്കാരങ്ങളില്ലാതെ, പുരോഗമനങ്ങളില്ലാതെ നമ്മുടെ നാട് വെറും കുഗ്രാമമായി നില കൊള്ളുന്ന പഴയകാലത്ത് മലയാളികൾ ഇത്രയേറെ ഭയന്നും ആശങ്കാജനകവുമായി ജീവിച്ചിട്ടുണ്ടായിരുന്നില്ല. കാലവും കാലഘട്ടവും മാറിയതോടെ വികസനങ്ങൾ ഒന്നൊന്നായി വന്നതോടെ ഗുണത്തേക്കാളേറെ ദോഷങ്ങളാണ് ആളുകൾ ഇന്ന് അനുഭവിക്കുന്നതെന്ന് വേണം കരുതുവാൻ.

നമ്മുടെ നാട് ഇന്ന് ഡിജിറ്റൽ യുഗത്തിന്റെ പിടിയിലാണ്. കമ്പ്യൂട്ടറിന്റെയും ഇന്റർനെറ്റിന്റെയുമൊക്കെ വരവോടെ സേവനങ്ങൾ ലഭ്യമാകുന്നതിലുപരി തട്ടിപ്പും വെട്ടിപ്പും പണമിടപാടുകൾ സംബന്ധിച്ച കൊള്ളയും കുതികാൽ വെട്ടും ഒക്കെയായി നമ്മുടെ രാജ്യം മാറിയിരിക്കുന്നു.

ഇന്ത്യ എന്റെ രാജ്യമാണെന്നും എല്ലാ ഇന്ത്യാക്കാരും എന്റെ സഹോദരീസഹോദരന്മാരാണെന്നും ഞാൻ എന്റെ രാജ്യത്തെ സ്നേഹിക്കുന്നുവെന്നുമൊക്കെ പ്രതിജ്ഞയെടുത്തവർ അതെല്ലാം മറന്ന് പ്രവർത്തിക്കുന്ന കാഴ്ചയാണ് ഇന്ന്നാടെങ്ങും കണ്ടുവരുന്നത്.

സോഷ്യൽമീഡിയായുടെ വരവോടെ ഞെട്ടിപ്പിക്കുന്ന സംഭവങ്ങളും വ്യാജ വാർത്തകളും പ്രചരിപ്പിച്ച് സാധാരണക്കാരെപ്പോലും ആശങ്കയുടെ മുൾമുനയിൽ നിർത്തുകയും തട്ടിപ്പുകൾക്ക് ഇരയാക്കുകയും ചെയ്യുന്നു.

സൈബർ പോലീസ് ഇത് സംബന്ധിച്ചുള്ള ധാരാളം അറിയിപ്പുകളും നിർദ്ദേശങ്ങളും നൽകുന്നുണ്ടെങ്കിൽ പോലും ദിനം പ്രതി പെൺകുട്ടികളും വീട്ടമ്മമാരും ഇത്തരം ചതി ക്കുഴികളിൽ വീഴുകയാണ്. ഇതിന്റെ പേരിൽ നിരവധി കേസ്സുകളാണ് രജിസ്റ്റർ ചെയ്യപ്പെട്ടിട്ടുള്ളത്. നല്ല ശ്രദ്ധയും ജാഗ്രതയും ബുദ്ധിയുമുണ്ടെങ്കിൽ ഇത്തരം സൈബർ കെണികളിൽ കുടുങ്ങാതെ ജീവിതം മുന്നോട്ട് നയി ക്കാൻ കഴിയുമെന്ന് ഈ രംഗത്തെ വിദഗ്ദ്ധർ അഭിപ്രായപ്പെടുന്നു.

സൈബർ ക്രൈമുകളിൽ ഭൂരിഭാഗവും ക്രിമിനലുകൾ മനഃശാസ്ത്രപരമായി ആളുകളെ തട്ടിപ്പിനിരയാക്കി മാറ്റുന്നു.

കുറഞ്ഞ സമയം കൊണ്ട് നിക്ഷേപത്തുകയുടെ ഇരട്ടി സമ്പാദിക്കാം, വീട്ടിലിരുന്നുകൊണ്ട് ലാഭം കൊയ്യാം എന്നൊക്കെയുള്ള തലക്കെട്ടുകളിൽ വരുന്ന പരസ്യങ്ങളിൽ വീട്ടമ്മമാർ പണക്കൊതി മൂത്ത് വീഴുകയാണ്. ഇത് തട്ടിപ്പായിരിക്കുമോ, സ്വന്തം പണം നഷ്ടപ്പെടുമോ എന്നൊക്കെ ഒന്ന് ചിന്തിക്കുകപോലും ചെയ്യാതെ അവർ ഈ കെണികളിൽ വീഴുകയാണ്.