பூங்காற்று திரும்புமா?

தேர்வு முடிந்து வெளியில் வரும்போதே முதல் தூறல் மண் பார்த்து இருந்தது. மெல்லிய கவலை மேவ சுஜாதா வானத்தை நிமிர்ந்து பார்த்தாள்.

கரிய மேகங்கள்திரண்டு கொண்டிருக்க 'எப்படியும் இந்த வளாகத்தை தாண்டுவதற்குள் மழை தலைவிரித்து ஆடுவேன்' என்று பயமுறுத்திக் கொண்டிருந்தது. சென்ட்டரை விட்டு வேகமாய் வெளியில் வந்தாள்.

பேராசிரியர் பணிக்கான தகுதித் தேர்வு. வார இறுதி நாள். கொஞ்சம் தள்ளியிருந்த பொறியியல் கல்லூரியில் தான் சென்டர் ஒதுக்கி இருந்தார்கள்.

மழைக்கு முந்தி விட வேண்டும் என்று கூட்டத்தை விலக்கிக் கொண்டு வாசலுக்கு வந்தாள். எதிரில் இருந்த மரத்தடியில் பைக்கை நிறுத்தி, ஒற்றைக் காலை அதன் மீது சரித்துக் காத்திருந்தவனை சட்டென்று கொண்டு பார்த்ததும் திரண்டிருந்த மொத்த மேகமும் மழையாய் தலையில் கொட்டிக் கவிழ்ந்தது போல் அப்படியொரு குளிர்ச்சி அகத்திலும் முகத்திலும் பரவியது.