வளமான வாழ்க்கைக்கு சுகாதாரம் அவசியம்!

‘சுத்தம் மற்றும் சுகாதாரம் ஒவ்வொருவரும் கடைபிடிக்க வேண்டிய அடிப்படையான விஷயம். இவை இரண்டையுமே நாம் கடைபிடித்து வந்தால், எந்தவித தொற்றும் நம்மை அண்டாது. ஆனால் நாம் வாழும் இந்த சூழலில் தொற்றுக்கள் காற்று மூலமாக கூட பரவும் என்று கோவிட் நமக்கு பாடம் கற்றுக் கொடுத்துள்ளது’’ என்கிறார் ரட்சனா. இவர் ‘மைக்ரோ கோ’ என்ற பெயரில் தொற்றுக்களை அழிக்கக் கூடிய கருவிகளை தயாரித்து வருகிறார்.

- ஷன்மதி

‘‘நான் மைக்ரோபயாலஜியில் முதுகலைப் பட்டம் படிக்கும் போதுதான் எனக்கு இந்த எண்ணம் ஏற்பட்டது. நம் சமூகத்திற்கு பயனுள்ள மற்றும் பிரச்னைகளின் தீர்வாகவும் இருக்கக்கூடிய ஏதாவது ஒன்றைக் கண்டுபிடிக்க வேண்டும் என்று நினைத்தேன். எனக்கு எப்பவுமே அப்லைட் சயின்ஸ் அதாவது பயன்பாட்டு அறிவியல் சார்ந்த விஷயம் மேல் தனிப்பட்ட ஈடுபாடு உண்டு. மேலும் என்னுடைய ஆர்வத்தைப் பார்த்த என் பேராசிரியர் என்னை பி.எச்.டி படிக்க சொன்னார். என் சொந்த ஊர் குஜராத் என்பதால் அங்கேயே பி.எச்.டி படிப்பில் சேர்ந்தேன். அந்த சமயத்தில் அமெரிக்காவில் உள்ள ஆய்வு நிறுவனம் எங்க கல்லூரியுடன் இணைந்து செயல்பட விரும்பினாங்க. அதன் காரணமாக நான் என் படிப்பை அமெரிக்காவில் தொடர்ந்தேன். அங்கு சென்ற பிறகு தான் தெரிந்தது பயன்பாட்டு அறிவியல் துறை உலகளவில் எவ்வாறு முன்னேறியுள்ளது என்பது. அங்கு 18 மணி நேரம் வேலை பார்த்தாலும், எனக்கு அலுப்பு ஏற்படவில்லை. காரணம், ஒவ்வொரு ஆய்விலும் என்ன மாதிரியான பொருட்களை உருவாக்க முடியும் என்பதில்தான் எங்களின் சிந்தனை இருந்தது. அமெரிக்காவில் படிப்பு மற்றும் வேலை என்பது பலரின் கனவு. அது எனக்கு தானாகவே அமைந்தது. அப்படி இருந்தும் என்னுடைய ஆழ் மனதில் நம் நாட்டிற்காக நாம் என்ன செய்யப்போகிறோம் என்ற கேள்வி ஒலித்துக்கொண்டே இருந்தது. அதை என் படிப்பினால் திருப்பித் தர விரும்பினேன்’’ என்றவர் எந்தவித யோசனையும் இல்லாமல் இந்தியா திரும்பினார்.