പിന്നീട് ദുഃഖിക്കാൻ ഞാനില്ല

കരിയറിന്റെ രണ്ടാം ഘട്ടത്തിൽ മികച്ച സിനിമകളുടെ തിരക്കിലാണ് അദിതി രവി 

- രൂപാ ദയാബ്ജി

ഇരിങ്ങാലക്കുട ലിറ്റിൽ ഫ്ലവർ കോൺവന്റിൽ നിന്ന് പത്താം ക്ലാസിൽ പിരിയുമ്പോൾ അദിതി രവിയുടെ ഓട്ടോഗ്രഫിൽ കൂട്ടുകാരി കാവ്യ എഴുതി, വലിയൊരു നടിയാകട്ടെ... അന്നു മുതൽ അദിതി സ്വപ്നം കണ്ടതാണ് സിനിമ. കോവിഡിനു ശേഷമാണ് കരിയറിലെ രണ്ടാം തുടക്കമെന്നു പറഞ്ഞാണ് അദിതി സംസാരിച്ചത്. “വ്യത്യസവും മികച്ചതുമായ കഥാപാത്രങ്ങൾ വരുന്നുണ്ട് ഇപ്പോൾ. ആ സന്തോഷം ചെറുതല്ല.

ബൈക്ക് റൈഡറാകുന്ന "ഖജുരാഹോ ഡീസും' സുരാജേട്ടന്റെ നായികയായ തനി നാടൻ വീട്ടമ്മയാകുന്ന "ലിക്കർ ഐലൻഡും' റിലീസിന് ഒരുങ്ങുന്നു. പുതിയ സിനിമയായ "ആബേലിൽ സൗബിൻ ഇക്കയുടെ നായികയാണ്.''

 രണ്ടു വ്യത്യസ്ത വേഷങ്ങൾ എങ്ങനെ ഒന്നിച്ചെത്തി?

 രണ്ടുവർഷം മുൻപാണ് "ലിക്കർ ഐലൻഡ് ഷൂട്ടിങ് തുടങ്ങിയത്. 20 ദിവസത്തെ ഷൂട്ടിങ് കഴിഞ്ഞപ്പോഴേക്കും സെറ്റിലെല്ലാം കോവിഡായി, ഷൂട്ടിങ് നീണ്ടു. ഇതിനിടയിൽ ചെയ്ത "പത്താം വളവും' റിലീസായി കഴിഞ്ഞാണ് "ലിക്കർ ഐലൻഡ് പൂർത്തിയായത്.

ലോക്ഡൗൺ ഇളവു വന്ന സമയത്താണ് ഖജുരാഹോ ഡ്രീംസി'ന്റെ ഷൂട്ടിങ്. നാല് ആൺകുട്ടികളും ഞാനുമടങ്ങുന്ന സംഘം ഖജുരാഹോയിലേക്കു പോകുന്നതാണു കഥ. കോളജിൽ പഠിക്കുമ്പോൾ കൈനറ്റിക് പ്ലഷർ ആയിരുന്നു വണ്ടി. സിനിമയ്ക്കു വേണ്ടി ഗിയറുള്ള ബൈക്ക് ഓടിക്കാൻ പഠിച്ചു. ഷൂട്ടിങ് രസമായി പോയെങ്കിലും  മൈസൂരിൽ വച്ച് വണ്ടി നിന്നു പോയി. കൂടെയുള്ളവർ നോക്കുമ്പോൾ എന്നെ കാണാനില്ല. തിരിച്ചു വന്നപ്പോൾ ചെറിയൊരു ബ്ലോക്. ബാക്കി ഊഹിക്കാമല്ലോ.

സിനിമയായിരുന്നോ എന്നും മോഹം ?