പൂവിളി..പൂവിളി...പൊന്നോണമായി

പൂവേ പൊലി ഉയരുന്ന ഓണക്കാലം നമുക്കു നൽകിയ അതിസുന്ദരമായ ഓണപ്പാട്ടുകളെക്കുറിച്ച് എഴുതുന്നു രവി മേനോൻ

ഓർത്താൽ ഇന്നും വിസ്മയമാണു വിദ്യാസാഗറിന് കഷ്ടിച്ച് ഇരുപത്തഞ്ചു സെക്കൻഡ് മാത്രം നീളുന്ന ഒരു സംഗീതശകലം ലോകമലയാളികളുടെ മുഴുവൻ ഓണസ്മൃതികളുടെ സിഗ്നേചർ ട്യൂൺ ആയി മാറുമെന്നു സങ്കൽപിച്ചിട്ടു പോലുമില്ല അതിന്റെ ശിൽപി. കാൽ നൂറ്റാണ്ടോളമായി ഓണപ്പൂക്കളം പോലെ, ഓണനിലാവ് പോലെ, ഓണ സദ്യപോലെ, ഓണവുമായി ചേർന്നുനിൽക്കുന്ന എല്ലാ മിത്തുകളെയും പോലെ ഇത്തിരിപ്പോന്ന ആ ഈണവും നമ്മുടെ ഗൃഹാതുരതയുടെ ഭാഗമായി മാറി.

25 വർഷം മുൻപ് തിരുവോണക്കൈനീട്ടം എന്ന ആൽബത്തിലെ "പറ നിറയെ പൊന്നളക്കും പൗർണമി രാവായി... എന്ന ഗാനത്തിനു വേണ്ടിയാണു വിദ്യാ സാഗർ അനവദ്യസുന്ദരമായ ഈ പശ്ചാത്തല സംഗീതശകലം സൃഷ്ടിച്ചത്. എന്താവാം ഈ പ്രതിഭാസത്തിന്റെ പൊരുളെന്നു ചോദിച്ചിട്ടുണ്ടു സംഗീത സംവിധായകനോട് 

 “എവിടെനിന്നാണ് ആ മ്യൂസിക്കൽ ബിറ്റ് ആ നിമിഷം എന്റെ മനസ്സിൽ, ചിന്തകളിൽ ഒഴുകിയെത്തിയത് എന്നറിയില്ല. വിദ്യാസാഗർ ഓർക്കുന്നു. “കാലത്തെ അതിജീവിക്കും അതെന്നു സങ്കൽപിച്ചിട്ടുമില്ല. ഓണത്തിന്റെ ഓർമകൾ ഉണർത്തുന്ന ഒരു പാട്ട് ചെയ്യണമെന്നേ ഉണ്ടായിരുന്നുള്ളൂ. അഞ്ചോ ആറോ മിനിറ്റ് ദൈർഘ്യമുള്ള ആ പാട്ടിന്റെ ഇൻട്രോയിലെ ഒരു പുല്ലാങ്കുഴൽ ശകലം അത്രകണ്ടു മലയാളികളെ വശീകരിച്ചു എന്നത് എന്നെപ്പോലും അദ്ഭുതപ്പെടുത്തുന്നു.

ഇന്നും ഓണക്കാലത്തു ടെലിവിഷനോ റേഡിയോയോ തുറന്നാൽ ആദ്യം ഒഴുകിയെത്തുക ആ ഈണമാണ്. സോഷ്യൽമീഡിയ ആശംസകളിൽ നിറയുന്നതും  അതു തന്നെ. ദൈവാനുഗ്രഹം എന്നേ പറയാനാകൂ. വിഖ്യാത പുല്ലാങ്കുഴൽ വാദകൻ നവീനാണു പാട്ടിന്റെ തുടക്കത്തിലെ മുരളീനാദശകലം വായിച്ചതെന്നും ഓർത്തു പറയുന്നു വിദ്യാജി.