ഞങ്ങളുണ്ടല്ലോ പിന്നെന്താ

ചിരിച്ചുല്ലസിക്കേണ്ട പ്രായത്തിൽ എന്തുകൊണ്ടാകും ചെറുപ്പക്കാർ ആത്മഹത്യയിൽ അഭയം തേടുന്നത്?

- ഡോ. ഹരി എസ്. ചന്ദ്രൻ സീനിയർ കൺസൽറ്റന്റ് സൈക്കോളജിസ്റ്റ്, ഡോ. കെ.എം. ചെറിയാൻ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ്, ചെങ്ങന്നൂർ.

നല്ല ഉണ്ണിയപ്പമാണ്. ചെറുപ്പം തൊട്ടേ കഴിക്കുന്നതാണ്, കാരണം, ഇതിന്റെ തൊട്ടടുത്താണ് അച്ഛന്റെ വീട്...' ഇടപ്പള്ളി ഗണപതി ക്ഷേത്രത്തിലെ പ്രശസ്തമായ ഉണ്ണിയപ്പത്തെക്കുറിച്ചു രാഹുൽ പറയുകയാണ്. "ഈറ്റ് കൊച്ചി ഈറ്റ്' എന്ന ഫൂഡ് വ്ലോഗിൾ തെളിഞ്ഞ ചിരിയോടെ നിറഞ്ഞ പോസീറ്റീവ് ഫീലോടെ ഓരോ വിഭവവും രാഹുൽ എൻ.കുട്ടി പരിചയപ്പെടുത്തുന്നത് ആരും കൊതിയോടെ കേട്ടിരുന്നു പോകും.

ആറു മാസം മുൻപൊരു വെള്ളിയാഴ്ചയാണ് ഉണ്ണിയപ്പത്തിന്റെ വീഡിയോ ഈറ്റ് കൊച്ചി ഈറ്റ് സോഷ്യൽമീഡിയയിൽ അപ്ലോഡ് ചെയ്തത്. ശനിയാഴ്ച രാവിലെ സുഹൃത്തുക്കളും ആരാധകരും കേൾക്കുന്നത് രാഹുലിന്റെ മരണവാർത്തയാണ്. വീട്ടിൽ തൂങ്ങി മരിച്ച നിലയിൽ കണ്ടെത്തുകയായിരുന്നു.

സോഷ്യൽ മീഡിയയിൽ ധാരാളം ഫോളോവേഴ്സ് ഉള്ള, സാമ്പത്തികമായോ, കുടുംബപരമായോ യാതൊരു പ്രശ്നങ്ങളുമില്ലാത്ത ഒരു ചെറുപ്പക്കാരൻ എന്തുകൊണ്ടാകും “മതി എനിക്കീ ജീവിതം' എന്നുറപ്പിച്ച് മരണത്തിന്റെ വാതിൽ സ്വയം തുറന്നത്?

പരീക്ഷയിൽ ഉദ്ദേശിച്ച വിജയം ലഭിക്കാതെ പോയതിന്റെ വിഷമമാണു കണ്ണൂർ സ്വദേശിനി ആർദ്ര സിരോഷിനെ മരണത്തിലേക്കു നയിച്ചത്. പത്താം ക്ലാസ് പരീക്ഷയിൽ ഒൻപത് എ പ്ലസും ഒരു എ ഗ്രേഡും ആണ് ആർദ്ര നേടിയത്. ഉറ്റസുഹൃത്തുക്കൾക്കെല്ലാം മുഴുവൻ എ പ്ലസ് കിട്ടിയതിന്റെ വിഷമം അവളെ അലട്ടിയിരുന്നു.

ടിവിയുടെ റിമോട്ട് നൽകാത്തതിന് അമ്മയുമായി വഴക്കിട്ട് ഏഴാം ക്ലാസ് വിദ്യാർഥി ആദിത്യൻ ആത്മഹത്യ ചെയ്തതു കായംകുളത്തിനടുത്ത് കണ്ടല്ലൂരിലാണ്. സീരിയൽ സിനിമ നടിമാരായ അപർണ നായർ, രഞ്ജുഷ, ഡോക്ടർമാരായ ഷഹ്നാ, അഭിരാമി, ബ്ലോഗർ റിഫ മെഹ്നു തുടങ്ങി പ്രശസ്തരായ ഒട്ടേറെ ചെറുപ്പക്കാർ കഴിഞ്ഞ ഒരു വർഷത്തിനിടയിൽ ആത്മഹത്യയിൽ അഭയം കണ്ടെത്തി.

എന്തു കൊണ്ട് ചെറുപ്പക്കാർ?

കാര്യകാരണങ്ങൾ മറ്റുള്ളവരുടെ ഭാവനയ്ക്കു വിട്ടുതന്നു കൊണ്ടു ദിനംപ്രതി അനേകംപേർ കേരളത്തിൽ സ്വയം മരണത്തെ പുൽകുന്നു. ചിരിച്ചുല്ലസിക്കേണ്ട കൗമാരത്തിലും പ്രതിസന്ധികളെ കരുത്തോടെ നേരിടേണ്ട ചെറുപ്പക്കാരിലും ആത്മഹത്യ കൂടുന്നതാണ് ഏറ്റവും സങ്കടം.