റെഡ്ബുള്ളിനു കടിഞ്ഞാണിടാൻ ഫെറാറി

അത്യന്തം നാടകീയ രംഗങ്ങളാണ് ഫോർമുല വൺ പോരാട്ടവേദികളിൽ

- മധുസൂദനൻ കർത്താ

ലീഡിൽ ഇളക്കമില്ലാതെ മുന്നേറുകയാണു മാക്സ് വേർപ്പസ്റ്റപ്പൻ. പക്ഷേ, കഴിഞ്ഞ രണ്ടു മത്സരങ്ങൾ (ബ്രിട്ടിഷ്, ഓസ്ട്രിയ) വിജയിച്ചു ഫെറാറി താൽക്കാലിക ബ്രേക്ക് നൽകിയിരിക്കുകയാണു റെഡ് ബുള്ളിന്. ആദ്യമത്സരം മുതൽ മികവു പ്രകടിപ്പിച്ച ഫെറാറിക്കു പല പ്പോഴും പോഡിയത്തിൽ കാലിടറുകയായിരുന്നു. ബ്രിട്ടനിൽ കാർലോസ് സെയ്ൻസും ഓസ്ട്രിയയിൽ ചാൾസ് ലെക്ലയറും വിജയിച്ചപ്പോൾ ഫെറാറിക്ക് ആശ്വാസമായി. ഈ വിജയ ഫോർമുല തുടർന്നാൽ റെഡ് ബുള്ളിനെ തളയ്ക്കാനാകുമെന്ന വിശ്വാസത്തിലാണു ഫെറാറി. ചാൾസ് ലെക്ലയറിനൊപ്പം കാർലോസ് സെയ്ൻസും മികവു പുലർത്തുന്നതോടെ ടീമിനു മുന്നേറാനാകും. രണ്ടു മത്സരത്തിലും മൂന്നാമതെത്തി ഹാമിൽട്ടൻ തിരിച്ചടികൾ അതിജീവിച്ചെങ്കിലും ചാംപ്യൻഷിപ്പിലേക്കുള്ള ദൂരം വർധിക്കുകയാണ്.

ഭീതി വിതച്ച സിൽവർ സ്റ്റോൺ

സിൽവർസ്റ്റോൺ സർക്യൂട്ട് ദുരന്തക്കളമാകുമെന്ന ഭീതിയോടെയായിരുന്നു ഫോർമുല വൺ ബ്രിട്ടിഷ് ഗ്രാൻപ്രിയുടെ തുടക്കം. വിജയിച്ചതു കാർലോസ് സെയ്ൻസ് ആണെങ്കിലും സിൽവർസ്റ്റോണിലെ യഥാർഥ ഭാഗ്യതാരം ആൽഫാ റോമിയോയുടെ ചോ ഗാന്യു ആയിരുന്നു. മത്സരത്തിന്റെ തുടക്കത്തിൽത്തന്നെയുണ്ടായ കൂട്ടിയിടിയിൽ ഗാന്യുവിന്റെ കാർ പറന്നു തലകീഴായി നിലത്തു വീണു കുറേദൂരം സർക്യൂട്ടിലൂടെ നിരങ്ങിനീങ്ങി ടയർ ഭിത്തിയിൽ ഇടിച്ചു നിൽക്കുകയായിരുന്നു. ചുവപ്പു കൊടി കാട്ടി മത്സരം നിർത്തിവച്ചു ഗാന്യുവിനെ ആശുപത്രിയിലെത്തിച്ചു. ഒരു മണിക്കൂറിനു ശേഷം മത്സരം പുനരാരംഭിക്കുമ്പോൾ ഗാന്യു അപകടനില തരണം ചെയ്തിരുന്നു.

ആൽഫാ ടോറി താരം പിയറെ ഗാസിയുടെ കാർ ജോർജ് റസ്സലിന്റെ മെഴ്സിഡീസിൽ ഇടിച്ചതോടെയാണ് അപകടപരമ്പരയുടെ തുടക്കം. റസ്സലിന്റെ കാർ നേരേ ചോ ഗാന്യുവിന്റെ കാറിൽ ഇടിക്കുകയായിരുന്നു.