ആയുസിനൊരു കൈയ്യൊപ്പ്

സംരംഭകനും യാത്രികനുമായ ഡോ. പ്രണവിന്റെ ത്രില്ലിങ് ജീവിതം

അധ്യാപക ദമ്പതികളുടെ മകനു മാഷാകാനായിരുന്നു മോഹം. മാതാവാകട്ടെ ഡോക്ടറാക്കാൻ മോഹിച്ചു. അധ്യാപന മോഹവുമായി ബിരുദത്തിന് ചേർന്ന ആ കൗമാരക്കാരൻ ഒടുവിൽ മനസില്ലാ മനസോടെ ബിഡിഎസിന് കർണ്ണാടകയിലേക്ക്. ഡിസ്റ്റിങ്ങ്ഷനോടെ വിജയം. നാട്ടിലെത്തി വർഷങ്ങൾക്കുള്ളിൽ ദന്തൽ ക്ലിനിക്കെന്ന സംരംഭം. പിന്നാലെ ദന്തൽ അക്കാദമി. യുവ ഡോക്ടറുടെ സംരംഭക സ്വപ്നങ്ങൾ കുതിരയെ പോലെ പാഞ്ഞു. ദന്തലും കോസ്മറ്റോളജിയും ചേർന്നൊരു നവീന സംരംഭത്തിന് പയ്യന്നൂരിൽ തുടക്കം. 53 ദിവസം ബുള്ളറ്റിൽ കശ്മീരും നേപ്പാളും ഭൂട്ടാനും പിന്നിട്ട് യാത്ര. ഇത് ഡോ. പ്രണവിന്റെ എനർജറ്റിക്ക് ജീവിതം.

കണ്ണൂരിന്റെ ചൂടും ചൂരുമുണ്ട് പയ്യന്നൂരിലെ 29 കാരനായ കോസ്മെറ്റിക് ദന്തൽ ഡോ. പ്രണവ് രാജഗോപാലിന്റെ ജീവിതത്തിൽ. ദന്തൽ ഡോക്ടറായി പ്രാക്റ്റീസ് ചെയ്തു മാസങ്ങൾക്കുള്ളിൽ സ്വന്തം ക്ലിനിക്ക് ആരംഭിച്ചു. യുവ ഡോക്ടർമാർ നേരിടുന്ന പ്രതിസന്ധികൾ മനസിലാക്കി കേരളത്തിലെ ആദ്യത്തെ ദന്തൽ അക്കാദമിക്ക് തുടക്കമിട്ടു. ഡോ. പ്രണവിന്റെ രണ്ടാമത് സംരംഭം. ആദ്യം പരിശീലനത്തിനു എത്തിയത് അഞ്ച് പേർ. 300 പേർ പരിശീലനം പൂർത്തിയാക്കി പുറത്തിറങ്ങി. ദന്തലിനു പിന്നാലെ കോസ്മറ്റോളജിയിൽ മറ്റൊരു സംരംഭം കൂടി. വിവിധ സംരംഭങ്ങൾക്കായി വായ്പയെടുത്തും കൈയ്യിലുള്ളതുമായി ഡോ. പ്രണവ് മുടക്കിയത് 1.25 കോടി രൂപ. മുതൽ മുടക്കിയ പണം ഒന്നര വർഷങ്ങൾക്കു ശേഷം തിരികെ പിടിച്ചു. ഡോ. പ്രണവ് രാജ ഗോപാലെന്ന യുവ സംരംഭകന്റെ സംരംഭക ജീവിതം ആരെയും ആവേശം കൊള്ളിക്കും. പയ്യന്നൂരിൽ മൂന്ന് ദന്തൽ ക്ലിനിക്കുകൾ, ദന്തൽ അക്കാദമി, ഒപ്പം കോസ്മറ്റോളജിയിൽ ഹെയർ ട്രീറ്റ്മെന്റ് ക്ലിനിക്കും. ഡോക്ടർമാർ അടക്കം 26സ്റ്റാഫുകൾ. സംരംഭകനായും ബുള്ളറ്റ് റൈഡറായും പൊതുസേവകനായും യാത്രികനായും ജീവിതം മുന്നോട്ട് നയിക്കുന്ന പ്രണവിന്റെ ജീവിത കഥയാണ് ഇക്കുറി എന്റെ സംരംഭത്തിന്റെ കവർ സ്റ്റോറി. യുവ സംരംഭകർക്കു പ്രചോദനമേകുന്ന രസകരമായ ജീവിതം ആടിത്തീർക്കുന്ന ഡോ.പ്രണവിന്റെ വിശേഷങ്ങൾ അറിയാം.

ബിരുദം ഉപേഷിച്ച് ബിഡിഎസിലേക്ക്