దీపావళి పోస్టర్ పోటీ

దీపావళి పోస్టర్ పోటీ కథ

- • కుముద్ కుమార్

"హే జంపీ, హరిత వనం రాజు దీపావళి రోజున "పిల్లలకు ముగ్గుల పోటీని నిర్వహిస్తున్నాడని తెలిసింది" చీకూ కుందేలు జంపీ కోతితో చెప్పాడు.

అప్పుడు లంబూ జిరాఫీ “అరే, నందన్ అడవి రాజు దీపావళి రోజున పిల్లలకు ఆటల పోటీని కూడా నిర్వహిస్తున్నాడట" అన్నాడు.

అప్పుడే మోటు ఏనుగు తొండం పైకెత్తి “అయ్యో.... అంతేకాదు మిత్రులారా... చందనపు (గంధం) అడవి రాజు తన వద్ద పిల్లలకు 'గిఫ్ట్ ప్యాకింగ్'ల పోటీని నిర్వహిస్తున్నాడట" అంటూ చెప్పాడు.

అప్పుడు గిల్లో ఉడుత "మిత్రులారా, దీపావళి రోజున మిగతా అడవుల్లో రాజులు, తమ పిల్లలకు పోటీలను నిర్వహిస్తున్నారు. కానీ మన చంపకవనం రాజు షేర్ సింగ్ మాత్రం దీపావళికి పిల్లలకు ఏమీ ఏర్పాటు చేయటం లేదు. అతనో పెద్ద పిసినారి" అంది.

“అరే, దీపావళి రోజున తన రాజమహల్ని జిగేల్ జిగేల్ మనే లైట్లతో అలంకరిస్తున్నాడు కదా? దీపావళి రోజున అది ఎలా మెరుస్తుందో చూడలేదా?” అన్నాడు బ్లాకీ ఎలుగుబంటి.

చంపకవనంలోని పిల్లలందరూ తమ రాజు షేర్సింగ్పై కోపంగా ఉన్నారు. ఎందుకంటే ఇతర రాజుల మాదిరిగా దీపావళి నాడు పిలలలకు అతను ఎలాంటి పోటీలను నిర్వహించటం లేదు.

అప్పుడు ఈ పిల్లలందరూ కలిసి షేర్ సింగ్కు తమ నిరసన తెలపాలని ఒక పథకం వేసారు. అయితే ఆ చిన్నారుల అసంతృప్తి విషయం షేర్సింగ్కు తెలిసింది.

దీంతో చిన్నారుల కోపాన్ని తొలగించేందుకు షేర్ సింగ్ కూడా ఓ పథకం వేసాడు. అప్పుడు షేర్ సింగ్ తన ప్రణాళికను విజయవంతంగా అమలు చేయడంతోపాటు పిల్లల నిరసన కార్యక్రమం అడ్డుకోవడానికి తన రాజరికపు దుస్తులను కాకుండా,

ఎర్రటి కుర్తా, తెల్లని పైజామా ధరించి సాధారణ అరణ్యవాసిగా మారాడు.

ఎవరికీ షేర్ సింగ్ తెలియకుండా తన రాజభవనం లోని రహస్య సొరంగ మార్గం నుంచి బయటకు వచ్చాడు.

అతను నేరుగా ప్లే గ్రౌండ్కి వెళ్లాడు. అక్కడ పిల్లలు తమ నిరసన కార్యక్రమం ఏర్పాట్లలో బిజీగా ఉన్నారు.

అతను దగ్గరలోని పొదల్లో దాక్కున్నాడు. పిల్లల మాటలు వింటూ వాళ్లు ఏం చేస్తున్నారో చూస్తున్నాడు.

అప్పుడు మోటూ “ప్రియమైన మిత్రులారా, షేర్సింగ్ దిష్టిబొమ్మ తయారైపోయి సిద్ధంగా ఉంది" అన్నాడు.

"ఏయ్ మోటూ, ఆ సింహం దిష్టిబొమ్మ తోకను ఇంకొంచెం పొడవుగా చేయ్. సింహాలకు తోక, మీసాలే వాటికి అసలైన గుర్తింపు. అవి చాలాసేపు కాలుతూ ఉండాలి" చీకూ మాటలతో పిల్లలంతా ఘోల్లుమంటూ నవ్వారు.