உயரும் சாலைகளும் புதையும் நகரங்களும்

கடல் மட்டத்திலிருந்து 6.4 மீட்டர் உயரத்தில் இருக்கிறது சென்னை மாநகரம்.

புவி வெப்பமாதலால் கடல் மட்டம் உயர்ந்து 2050-க்குள் சென்னையின் 144 சதுர கி.மீ. அளவிலான நிலப்பரப்பு நீரில் மூழ்கிவிடும் என ஓர் ஆய்வு எச்சரிக்கிறது. அத்துடன், கடந்த பத்தாண்டுகளாகச் சாலைகளாலும் அதாவது, சாலை உயர்வுகளாலும் புதைந்து கொண்டிருக்கிறது சென்னை.

2015, 2023 வெள்ளங்களில் சென்னையே மூழ்கி, மக்களின் ஏராளமான சொத்துகள் சாலைகளில் குப்பை மலைகளாக வீசப்பட்டன. அந்தப் பேரழிவுக்கு அடிப்படைக் காரணம், சென்னையின் சாலைகள் மளமளவென உயர்த்தப்பட்டதுதான் என வல்லுனர்கள் தெரிவித்துள்ளனர்.

புதையுண்டுவரும் சென்னை

1992-ஆம் ஆண்டு, சென்னைப் பல்கலைக்கழகத்தில் நடைபெற்ற கருத்தரங்கு ஒன்றில் அப்போதைய துணைவேந்தர் டாக்டர் எஸ்.சாதிக் பேசும்போது, அவரது மாணவப் பருவத்தில் சென்னைப் பல்கலைக்கழகத்தின் கலைநயம் மிக்க மதில் சுவருக்குக் கீழே நடைமேடையும், அதற்கும் கீழே சாலையும் இருந்ததாக நினைவு கூர்ந்திருந்தார்.

இப்போது மதில் சுவரின் தலை மட்டுமே தெரிகிறது; சாலையானது தொடர்ந்து மேலே மேலே போடப்பட்டதால் மதில் சுவர் மறைந்துவிட்டது என்றும் குறைப்பட்டுக்கொண்டார். இப்போது நிலைமை இன்னும் மோசம், கடந்த 30 ஆண்டுகளில் அந்தச் சுவர் முழுமையாகப் புதைக்கப்பட்டு புதிய சுவர் எழுப்பப்பட்டுள்ளது.