ഗോഡ്ഫാദറില്ല, അഭിമുഖങ്ങളില്ല.പക്ഷേ 'തല' പോലെ വരുമാ...

വീഴ്ചയുടെ പടുകുഴിയിൽ കൈനീട്ടിയവർക്ക് അഭിമാനിക്കാൻ എന്തെങ്കിലുമൊന്ന് കരുതിവയ്ക്കാനുള്ള അജിത്കുമാറിന്റെ യാത്ര തുടരുന്നു.

- പി.ജി.എസ്. സൂരജ്

പുടിച്ചത് സെയ്യറുത് എന്നേക്കുമേ മാസ് എന്ന വരിയുടെ അർത്ഥമെന്താണെന്ന് ജീവിതം കൊണ്ട് തെളിയിച്ചിരിക്കുകയാണ് തമിഴ് സൂപ്പർതാരം അജിത്കുമാർ. സൂഫി കവിയായ റൂമി എഴുതിയതുപോലെ "നിങ്ങൾ തേടുന്നതെന്താണോ, അത് നിങ്ങളെയും തേടുന്നുവെന്ന വരികൾ പോലെയാണ് എ.കെയുടെ ജീവിതം. അങ്ങനെയാണ് തമിഴ് മക്കൾ അജിത്തിനെക്കുറിച്ച് സ്നേഹത്തോടെ പറയുന്നത്. ആ സ്നേഹവാഴ്ത്ത് കേട്ടുകേട്ട് ഒടുവിൽ അജിത്ത് ഒരു പ്രസ്താവനയിറക്കി. എന്റെ പേര് അജിത്കുമാർ എന്നാണ്. ഒന്നുകിൽ അങ്ങനെ വിളിക്കു അല്ലെങ്കിൽ എ.കെ. എന്ന് വിളിക്കൂ. പക്ഷേ പഠിച്ചതല്ലേ മക്കൾ പാടൂ. തോൽവിയേയും വിജയത്തേയും കുറിച്ചോർത്ത് ആധി പിടിക്കാത്ത എ.കെയെ നോക്കി വീണ്ടും ഒരു സമൂഹം പാടി "കടവുള്ള അജിത്തേ' എന്ന്. അതും അരുതെന്ന് ആവർത്തിച്ച അജിത്തിനെ നോക്കി ഫാൻസ് പുതിയൊരു പേര് വിളിച്ചു.

"ഓറ എ.കെ

മെക്കാനിക്കിൽ നിന്ന് അഭിനയ ലോകത്തേയ്ക്ക്. അവിടെ നിന്ന് വീണ്ടും പിടിച്ചെഴുന്നേറ്റു വീണ്ടും മുന്നോട്ട്. ഇപ്പോഴിതാ 53-ാം വയസ്സിൽ രാജ്യത്തിനുതന്നെ അഭിമാനമായി തന്റെ എക്കാലത്തേയും സ്വപ്നപദ്ധതിയായ കാർ റേസിംഗ് ടീമുമായി തലയുയർത്തി നിൽക്കുന്നു.

ദുബായ് 24 എച്ച് കാറോട്ട മത്സരത്തിലാണ് നടൻ അജിത്ത് കുമാറിന്റെ ടീം മൂന്നാം സ്ഥാനം സ്വന്തമാക്കിയത്. ഈ വാർത്ത താരത്തിന്റെ ആരാധ കർ മാത്രമല്ല സോഷ്യൽ മീഡിയ ഒന്നാകെ ഏറ്റെടുത്തുകഴിഞ്ഞു. ദുബായ് ഓട്ടോഡ്രോമിൽ നടന്ന കാർ റേസിംഗ് കാണാനെത്തിയതും നിരവധിപ്പേരാണ്.

2024 സെപ്തംബറിലാണ് താരം അജി ത്കുമാർ റേസിംഗ്' എന്ന റേസിംഗ് ടീം സ്ഥാപിച്ചത്. ടീമിൽ അജിത്തിന് കൂട്ടായി മാത്യു ടി, ഫാബിയാൻ ഡഫിയക്സ്, കാമറൂൺ മക്ലിയോഡ് എന്നിവരുമുണ്ടായിരുന്നു.

വച്ചുനീട്ടുന്ന സ്നേഹത്തെ യാകെ ചേർത്തുപിടിച്ചാണ് ഈ മനുഷ്യൻ ഇഷ്ടങ്ങൾക്ക് പിന്നാലെ പായുന്നത്. മൾട്ടി ടാസ്കിംഗ് ഇഷ്ടമല്ലാത്ത, പോകുന്നവഴിയിൽ ആരവവുമായി കൂടെ കൂടുന്നവരോട് ചിരിച്ചുകൊണ്ട് സമയം പാഴാക്കാതെ ഇഷ്ടപ്പെട്ടത് ചെയ്ത് മുന്നേറുകയെന്ന് ആവർത്തിക്കുന്ന എ.കെ. ഒരാവേശമാണ്. പരാജയപ്പെടാനുള്ള സാധ്യതകൾ ഇതൊക്കെയാണെന്ന് ചൂണ്ടിക്കാണിക്കുന്നവരെ നോക്കി ചിരിച്ചുകൊണ്ടാണ് തന്റെ 53-ാം വയസ്സിലും ആ മനുഷ്യൻ പറഞ്ഞത് "എന്നം പോൾ വാഴ്‌കെ എന്നാണ്.