പ്രളയമെത്തും മുൻപേ വിളവെടുക്കാൻ കുള്ളൻ നേന്ത്രൻ

കുള്ളൻ നേന്ത്രനിൽ മുടക്കിയ പണവും ലാഭവും നേരത്തേതന്നെ കൈവശമെത്തും ശ്രീധരൻ ചൂണ്ടിക്കാട്ടി.

കാലാവസ്ഥാമാറ്റമാണ് ഇപ്പോൾ എല്ലാ കർഷകരുടെയും ഒരു പേടിസ്വപ്നം. അപ്രതീക്ഷിതമായി പ്രളയമോ വരൾച്ചയോ ഉണ്ടായാൽ വിളനാശത്തിനു സാധ്യതയേറെ. അതിനാൽ കാലാവസ്ഥാമാറ്റത്തെ ലഘൂകരിക്കുന്നതിനുള്ള ശ്രമങ്ങൾക്കൊപ്പം അതിജീവിക്കുന്നതിനുള്ള വഴികളും തേടേണ്ടതുണ്ട്.

അപ്രതീക്ഷിത കാലാവസ്ഥദുരന്തങ്ങളിൽ നിന്നു രക്ഷപ്പെടാൻ കൃഷിക്കാർ സ്വീകരിക്കുന്ന മുൻകരുതലുകളിലൊന്നാണ് ഹ്രസ്വകാല വിളകൾ കൃഷിയിറക്കുകയെന്നത്. എത്രയും നേരത്തെ വിളവെടുത്താൽ അത്രയും നന്ന്. മഴയെത്തും മുൻപേ മരച്ചീനി വിളവെടുത്താൽ പ്രളയത്തെ പേടിക്കേണ്ടല്ലോ? ഉണക്കാകും മുൻപ് നെല്ല് കൊയ്താൽ വരൾച്ചയെയും ഭയപ്പെടേണ്ട. നെല്ലിലും മരച്ചീനിയിലുമൊക്കെ ഹ്രസ്വകാല ഇനങ്ങൾ പലതുണ്ടെങ്കിലും നേന്ത്രവാഴകൃഷിയിൽ അങ്ങനെയൊരു സാധ്യത അപൂർവം. എന്നാൽ കോഴിക്കോട് മാവൂരിൽ വാഴക്കൃഷി ചെയ്യുന്ന ശ്രീധരൻ കുഴിയാട്ടുകുറായിൽ നേന്ത്രൻകൃഷിയിലും ഇത്തരമൊരു സാധ്യത കണ്ടെത്തിക്കഴിഞ്ഞു.