പാടങ്ങൾക്കൊരു പമ്പിങ് ഓപ്പറേറ്റർ

നെൽപാടങ്ങളിലെയും മത്സ്യക്കുളങ്ങളിലെയും പമ്പിങ് ഓട്ടമേഷനുള്ള സാങ്കേതിക വിദ്യയുമായി അമൽജ്യോതി കോളജിലെ പൂർവവിദ്യാർഥികൾ

നിങ്ങളുടെ പാടത്തെ പമ്പിങ് ഒരു തലവേദനയാണോ? അതിനായി സർക്കാരും കൃഷിക്കാരും മുടക്കുന്ന തുകയ്ക്ക് ആനുപാതികമായ പ്രയോജനം കിട്ടുന്നുണ്ടോ? ഇല്ലെങ്കിൽ അഗ്രോവ് ടീനിനെ വിളിച്ചോളൂ. താരതമ്യേന കുറഞ്ഞ തുക ഈടാക്കി പമ്പിങ് സ്വയം നിയന്ത്രിത സംവിധാനത്തിലേക്കു കൊണ്ടുവരിക മാത്രമല്ല, അതിന്റെ നടത്തിപ്പു ചുമതല ഏറ്റെടുക്കാനും ഇവർ തയാർ. പുതിയ പമ്പ് സ്ഥാപിച്ചോ നിലവിലുള്ള പമ്പ് പരിഷ്കരിച്ചോ ഈ ഓട്ടമേഷൻ സാധ്യമാക്കാം. നെല്ലിന്റെ വളർച്ചഘട്ടമനുസരിച്ചും വെള്ളത്തിന്റെ അമ്ലതയനുസരിച്ചുമൊക്കെ പാടത്തെ ജലനിരപ്പ് താനേ ക്രമീകരിക്കാൻ ഇതുവഴി സാധിക്കും. അതിനായി ഇതുവരെ ഉപയോഗിച്ചിരുന്ന പെട്ടിയും പറയും മോട്ടർപുരയും ഓപ്പറേറ്ററുമൊക്കെ ക്രമേണ വേണ്ടെന്നു വയ്ക്കാം.